Om Hordaland

Plassering. Landskap

Hordaland fylke ligg i sørvest Noreg, sentralt på Vestlandet mellom Sogn og Fjordane i nord og Rogaland i sør. I aust grensar fylket til Buskerud og Telemark og i vest til Nordsjøen, med Skottland på hi sida av havet. Landskapet er variert og storslått med høge fjell, fjellplatå – Hardangervidda, fjordar, imponerande fossefall, isbrear – Folgefonni i sør og Hardangerjøkulen i aust, øyer, skjer og lune vikar.

Hordaland er det einaste fylket der alle kommunane grensar til sjøen. Frå Fedje.

Folket

Hordaland har kring 470 000 innbyggjarar (2009), nær 10 % av det totale folketalet i landet, og er det tredje største fylket i landet rekna etter folketal. Hordaland er eit tverrkulturelt fylke med vel 157 ulike nasjonalitetar. På denne bakgrunnen er kulturlivet og det religiøse livet i Hordaland mangfelt. Her er eit syttitals ulike trussamfunn og ei rekkje minoritetsspråk.

Forvaltning

Noreg har tre forvaltningsnivå: Statsforvaltninga med Stortinget, regjeringa, departement og direktorat og tilsyn, regionalforvaltninga med fylkeskommunane og lokalforvaltninga med kommunane.

Staten er representert i fylket ved fylkesmannen, kongen og regjeringa sin representant. Hordaland fylkeskommune sin administrasjon ligg i fylkeshovudstaden Bergen. Her er og statlege regionkontor og nasjonale statlege direktorat.

Fylket er delt inn i 33 kommunar av svært ulik storleik frå Modalen med 351 innbyggjarar til Bergen med over 252 000 (2009).