Politiske organ

Politisk styringsstruktur
Gjeldande politisk styringsstruktur i Hordaland fylkeskommune vart sett i verk frå 15. oktober 2003 då fylkestingsperioden (2003-2007) tok til. Målet er å ha ein styringsstruktur som er tilpassa fylkeskommunen sine oppgåver og som legg til rette for heilskapleg politikkutforming og kontroll. Styringsstrukturen skal vera effektiv og gjera fylkeskommunen sine viktigaste oppgåver synlege gjennom utvalsstrukturen og fordelinga av oppgåvene. Fylkestingsvalet 2011 Folkevalde organ og verv for perioden 2007-2011 Folkevalde organ og verv for perioden 2003-2007 Skissa nedanfor viser hovudtrekka i den politiske styringsstrukturen som gjeld for Hordaland fylkeskommune.	Møteplan Administrativ organisering Medlemer i sentrale organ Fylkestinget Fylkesutvalet Administrasjonsutvalet Kultur- og ressursutvalet Opplærings- og helseutvalet Samferdselsutvalet Kontrollutvalet Klagenemnda Andre utval/organ Fylkeseldrerådet Rådet for menneske med nedsett funksjonsevne Ungdommens fylkesting Vestlandsrådet

Fylkestinget

57 medlemer

Fylkestinget er det øvste politiske organet i fylkeskommunen og har ansvar for alle fylkeskommunale oppgåver. Fylkestinget gjer vedtak på vegner av fylkeskommunen så langt anna ikkje følgjer av lov, forskrift eller delegasjonsvedtak.

I praksis ivaretek fylkestinget ansvaret sitt ved å delegera oppgåver til fylkesutvalet, dei faste utvala og til fylkesrådmannen. Fylkesrådmannen på si side vidaredelegerer mynde til andre i fylkesadministrasjonen og til institusjonar og skular.

Sentrale oppgåver for fylkestinget er:

Fylkesplanlegging
Planlegging av fylkeskommunen si eiga verksemd
Økonomiplan og årsbudsjett

I valperioden 2011 - 2015 er ni politiske parti representerte i fylkestinget:
Høyre 17 representantar, Det noske Arbeiderparti 16, Fremskrittspartiet 8, Kristeleg Folkeparti 5, Venstre 4, Senterpartiet 3, Sosialistisk Venstreparti 2 Raudt 2 og Miljøpartiet De Grønne 1.

Fylkestinget har 4-5 samlingar i året. Fylkesutvalet har eitt møte i månaden, og dei andre utvala om lag eitt møte i månaden.

Fylkesordførar 2011-2015 er Tom-Christer Nilsen.

Fylkesutvalet

15 medlemer

Fylkesutvalet har det daglege ansvaret for samordning av den fylkeskommunale verksemda.

Fylkesutvalet er fylkeskommunen sitt driftsutval, og tek endeleg avgjerd i driftssaker som ikkje er lagde til andre organ eller administrasjonen.

Ansvaret for samordning, planar, økonomi, næringssaker og overordna næringspolitikk ligg til fylkesutvalet som saman med representantar for arbeidstakarane også er administrasjonsutval.

Alle saker frå dei faste utvala som gjeld planar og økonomi skal handsamast av fylkesutvalet før endeleg avgjerd.

I samband med at fylkesutvalet også er administrasjonsutval er det inngått protokoll med arbeidstakarorganisasjonane. Av den går det fram at arbeidstakarane skal ha fire representantar i administrasjonsutvalet saman med fylkesutvalet sine 15 representantar.

Dei 15 medlemene i fylkesutvalet er valde mellom fylkestingsrepresentantane. Resten av fylkestingsrepresentantane er medlemer i eit av dei tre politiske utvala eller i kontrollutvalet.

Faste utval

Kultur- og ressursutvalet	13 medlemer
Opplærings- og helseutvalet	13 medlemer
Samferdselsutvalet	13 medlemer

Enkelte driftsoppgåver som før låg til fylkesutvalet, er overført til utvala. Utvala har mellom anna vedtaksrett i saker som gjeld fordeling av budsjetterte tilskots- og stønadsmidlar. Kultur- og ressursutvalet har vedtaksrett i ei rekkje plansaker.

Kontrollutvalet

Kontrollutvalet i Hordaland fylkeskommune har 5 medlemer. Av desse skal leiar, nestleiar og ein av styremedlemene veljast blant fylkestinget sine medlemer.

Kontrollutvalet skal føra tilsyn og kontroll med den fylkeskommunale forvaltinga på vegner av fylkestinget og sjå til at fylkeskommunen har ei forsvarleg revisjonsordning. ”Forskrift om kontrollutvalg i kommuner og fylkeskommuner” er ein viktig basis for kontrollutvalet si verksemd.

Meir om kontrollutvalet | Sekretariatet for kontrollutvalet

Klagenemnda

Klagenemnda er klageinstans for enkeltvedtak fatta av fylkeskommunalt organ. Dette gjeld likevel ikkje vedtak som er fatta av fylkestinget. Nemnda har 5 medlemer.