Budsjettet for 2006 var vedteke med dei 30 røystene til Høgre, Kristeleg folkeparti, Fremskrittspartiet og Pensjonistpartiet. Dei andre partia røysta for eigne budsjettforslag.
Samanlikna med fylkesrådmannen sitt budsjettforslag, har fylkestinget fordelt vel 32 mill. kr meir til drifta. Denne auken fordeler seg slik:
· 16,5 mill. kr meir til tiltak for born og ungdom
· 10 mill. kr meir til nyasfaltering av fylkesvegane
· 3,85 mill. kr meir til kulturtiltak
Vidaregåande opplæring
Vidaregåande opplæring får påplussing på 14,65 mill. kr. Utstyrsposten vert auka med 5 mill. kr til 13,5 mill. kr og løyvinga til IT-utstyr vert auka med 5 mill. kr til 16 mill. kr. Samanlikna med 2005 er løyvinga til utstyr auka med 8 mill. kr og løyvinga til IT-utstyr med 10 mill. kr, samla styrking er på 18 mill. kr.
Løyvinga til læretimar vert auka med 3 mill. kr.
Tilskot til idrettshallar vert auka med 0,5 mill. kr og auken i 2006 skal gå til idrettshall i Austevoll som dermed vil få tilskot på 2,5 mill. kr. Andre påplussingar: 0,4 mill. kr meir til ungt entreprenørskap, 250 000 kr til prosjekt mot fråfall, 250 000 kr til fagopplæring og 250 000 kr til lærarevaluering.
Leige av Nordhordlandshallen
I arbeidet med tilbygg for Knarvik vidaregåande skule ber fylkestinget om at det vert gjennomført tingingar med eigarane av Nordhordlandshallen om bruk av det areal som dekkjer skulen sitt behov for lokale til kroppsøving. Dersom forhandlingane fører fram, skal skulen sine eigne lokale for kroppsøving innarbeidast i planen for tilbygg slik at desse saman med nytt tilbygg dekkjer skulen sitt behov for nytt areal.
Samferdsel
Til samferdsel vert påplussinga 13,8 mill. kr. Av denne summen er 10 mill. kr ekstraløyving i 2006 til nyasfaltering av fylkesvegar. Samla vert budsjettet til vedlikehald av fylkesvegane på 110 mill. kr eller ca. 25 mill. kr meir enn for 2005.
2 mill. kr vert budsjettert til incentivtiltak for kollektivtrafikken. Dette kan vera konkrete rute- eller prisendringar eller kreative marknadsføringstiltak, heiter det i forslaget.
1 mill. kr er sett av for å redusera prisen på ungdomskort med inntil 10 % frå 1. august 2006 (ny pris ca. 320 kr pr månad). Det er ei målsetjing å redusera prisen på ungdomskortet ytterlegare eller å føreta andre tiltak for å stimulera ungdomen til å reisa kollektivt.
0,5 mill.kr skal gå til å betra tilbodet til dei som er definert som dei tunge brukarane i transportordninga for funksjonshemma.
Til styrking av Espeværruta er det løyvd 300 000 kr.
Fylkestinget ber om at det vert fremja ei eiga sak til samferdselsutvalet som greier ut eit eventuelt periodekort for dei som jobbar ved verna bedrifter.
Kultur
Budsjettet til kulturføremål får auke på 3,85 milll.kr.
Til nytt bygg ved Vestnorsk utvandringssenter på Radøy er det løyvd 1 mill.kr. Bergen og omland friluftsråd får 1 mill. kr til ny båt.
For å sikra Hardanger folkemuseum mot vasskader frå lekkasjar i tak, er det løyvd 750 000 kr. Til bannsikring ved Agatunet er det løyvd 250 000 kr.
Løyvinga til Hordaland barne- og ungdomsråd vert auka med 300 000 kr. 50 000 kr er løyvd til SAFO og til rådvelde-kontoen for kultur- og ressursutvalet er auka med 500 000 kr.
Kulturtilskot vert fordelte i januar
På kulturbudsjettet er det ei lang rekkje tilskotspostar. Desse tilskotspostane er vedtekne som rammeløyvingar med atterhald om endeleg konkret fordeling til organisasjonar, festivalar med fleire i kultur- og ressursutvalet sitt møte i januar. Fylkestinget seier i vedtaket sitt at det skal takast omsyn til at tilskotsmottakarar som får endringar i tilskota sine skal ha tilstrekkeleg høve til omstilling.
Regional utvikling og administrasjon
Fylkestinget ynskjer å medverka til etablering av eit undervisningstilbod på høgskulenivå i etablering og nyskaping, og har vedteke å yta eit tilskot på 0,5 mill.kr til finansiering av ei professorstilling ved Høgskolen i Bergen.
Informasjonstenesta i fylkeskommunen er vedteken styrkt med ei stilling.
Finansiering
Påplussingane på ca. 32 mill. kr i høve til fylkesrådmannen sitt budsjettforslag vert finanserte ved at overføringa frå drift til investeringar vert redusert med 20 mill. kr og ved å nytta 12,1 mill. kr av udisponert budsjettsum på 15 mill. kr.
Fylkestinget legg opp til at ein ved eventuelt overskot i 2005 skal prøva å gjenoppretta eigenfinansieringa av investeringane med same sum som no vart teke frå drift til investeringar.
Attvunnen handlefridom
I fellesforslaget frå H, KrF og Frp, som fylkestinget har vedteke, heiter det innleiingsvis: «Fylkeskommunen har attvunne den økonomiske handlefridomen og fylkestinget ynskjer å prioritera nye midlar til viktige kjerneoppgåver.
Handlefridomsprosjektet, stram økonomistyring og auka rammer har gjeve ny handlefridom til fylkeskommunen. Det er framleis viktig med stram økonomistyring og at prosjekta som er vedtekne i samband med handlefridomsprosjektet vert gjennomførde. Fylkestinget ønskjer å bruka denne handlefridomen til å prioritera nokre viktige område.»
Andre budsjettforslag
Arbeiderpartiet, Sosialistisk venstreparti, Senterpartiet, Venstre og Raud Valallianse sette alle fram eigne budsjettforslag. Forslaga fekk røystene til dei respektive forslagsstillarane.
Arbeiderpartiet
Arbeiderpartiet føreslo endringar på 34 mill. kr i høve til fylkesrådmannen sitt forslag.
Til vidaregåande opplæring føreslo Ap auke på 19,9 mill. kr inkludert 0,4 mill. kr til oppretthalding av filialklassen i Granvin. 8,6 mill. kr vart føreslege til samferdselstiltak, m,a, 4,0 mill. kr til å reversera samanslåinga av skulereisekort og ungdomskort og 3,0 mill. kr til auka kollektivsatsing.
Andre påplussingar: 600 000 kr til næringsretta tiltak, 2 mill. kr til den kulturelle skulesekken og tilskot til fylkesidrettsanlegg, 2 mill. kr til barne- og ungdomsorganisasjonar og særlege prosjekt for born og unge, 0,2 mill. kr til funksjonshemma sine organisasjonar og 0,2 mill. kr meir til reiselivstiltak.
Påplussingane vil Ap finansiera med 15 mill. kr i ufordelte midlar frå statsbudsjettet og 19 mill. kr omdisponert frå investering.
Forslaget fekk Ap sine 13 røyster og fall.
Sosialistisk venstreparti
Sosialistisk venstreparti føreslå styrking av driftsbudsjettet med 58 mill. kr i høve til fylkesrådmannen sitt budsjettforslag. Påplussinga finansierer SV ved å nytta 35 mill. kr mindre i driftsmidlar til investeringar og nyttar 23 mill. kr i udisponerte midlar.
Påplussinga fordeler seg med 4,2 mill. kr til kultur, 27,05 mill. kr til opplæring, 18,25 mill. kr til samferdsel, 8,05 mill. kr til fellestiltak og næringsføremål.
Forslaget fekk SV (6) og RV (2) sine åtte røyster og fall. RV røysta primært for sitt eige forslag, men støtta SV sitt forslag etter at RV sitt eige forslag fall.
SV fremja også ei rekkje verbalforslag som fekk 25 (Ap, SV, RV, Sp) røyster og fall. SV-forslaget om å omgjera Hardangerbrufondet til eit tryggleiks-/rassikringsfond fekk 10 (SV, RV, V) røyster og fall.
Senterpartiet
Senterpartiet føreslo påplussingar på 31,9 mill. kr til drifta. Summen fordeler seg med 12,5 mill. kr til samferdsel, 15,4 mill. kr til opplæring, 3,7 mill.kr til kultur 0,3 mill. kr til næring. Påplussingar vert finansiert med 15 mill. kr i ufordelt sum frå statsbudsjettet og 16,9 mill. kr mindre i driftsmidlar til investeringar.
Inkludert i påplussinga til opplæring er 0,4 mill. kr til oppretthalding av filialklassen i Granvin.
Påplussinga til samferdsel vil Sp fordela med 1 mill. kr til transport av funksjonshemma, 4 mill. kr til frivillig samordning av ungdomskort og skulereisekort, 7 mill. kr til fylkesvegvedlikehaldet og 0,5 mill. kr til «Trygt heim-prosjektet».
Forslaget fekk Sp sine 4 røyster og fall.
Venstre
Venstre føreslo påplussing på 35,0 mill. kr. Summen fordeler seg med 10,8 mill. kr meir til samferdsel, 4 mill. kr til kultur (særleg museum), opplæring 18,9 mill. kr og 1,3 mill. kr til regional utvikling og næringsutvikling.
Auken til samferdsel vil Venstre fordela med 8 mill. kr til incentivmidlar kollektivtrafikk (særleg «nedbetalte bruer», 1,8 mill. kr til ungdomskort, 0,5 mill. kr til transport for funksjonshemma, 0,3 mill. kr til Espeværruta og 0,2 mill. kr til Trygt heim-prosjektet.
Påplussinga vil Venstre finansiera med 15 mill. kr frå udisponerte midlar frå statsbudsjettet og 20 mill. kr i mindre bruk av driftsmidlar til investeringar.
Forslaget fekk Venstre sine 2 røyster og fall.
Raud valallianse
Raud valallianse føreslo påplussingar på 152 mill. kr
Påplussinga fordeler seg med 4,5 mill. kr til kultur, 110,45 mill. kr til opplæring, 2 mill. kr til tannhelse og 35 mill. kr til samferdsel.
RV ville også løysa opp Hardangerbrufondet om nytta midlane til nærings- og investeringsføremål. Like eins ville RV nytta 120 mill. kr meir til opprusting, vedlikehald og nybygg for dei vidaregåande skulane, og 10 mill. kr meir til fylkesvegar. RV kutta i løyvingane til Vestnorsk Brüsselkontor og Hordaland olje og gass. Like eins kutta i ordførarløn og fylkesvaraordføraren.
Forslaget fekk RV sine to røyster og fall.