Regionalt planforum

I Regionalt planforum kan kommunane legge fram planar som er under arbeid til drøfting. Planforum er ein viktig møteplass mellom dei enkelte kommunar og sektororgan på regionalt nivå. Regionalt planforum er forankra i Plan og bygningslova (§ 5-3). Møta i planforum finn som regel stad i møterom Sunnhordland i Fylkeshuset (biletet).

Sekretariat

Hordaland fylkeskommune er sekretariat for Regionalt planforum. Kommunar som ønskjer å ta aktuelle planar opp til drøfting må ta kontakt med Planseksjonen, Regionalavdelinga v/ Torild Hage, 55239332, torild.hage@hfk.no

Regionalt planforum i Hordaland - ein viktig møteplass (brosjyre)

Kva er føremålet med regionalt planforum?

Planforum skal bidra til gjensidig informasjon, drøfting og avklaring av planspørsmål og sektorinteressar mellom kommunar, fylke og sektormynde. Det skal og bidra til betre samordning av ulike interesser og syn, raskare avklåring og ein meir samstemt praksis i plansaker i fylket. Planforum medverkar til å styrke planlegginga generelt og til å redusere talet på motsegner.

Kva type planar?

Drøfting i planforum er særleg naudsynt for kommuneplanane, men og for kommunedelplanar og større reguleringsplanar. Det er ønskjeleg at kommunane kjem i planforum med ein plan minst to gonger, før planprogram og før planframlegg vert sendt på formell høyring. Det kan og verte aktuelt å drøfte kommunale planstrategiar som er innført med ny Plan- og bygningslov.

Korleis føregår møtet?
Planforum vert halde på fylkeshuset med mindre anna er avtalt. Det er vanleg å starte møtet med ei generell orientering frå kommunen. Sakspapir må sendast elektronisk seinast fire dagar før møtet. Slikt bakgrunnsmateriell vert lagt ut på ei mellombels nettside på Kommunedøra.
Kven deltar?
Det er vanleg at kommunepolitikarar saman med kommuneadministrasjonen møter i planforum. Sektororgan som gjer fråsegn til planar har høve til å møte i planforum, sjå adresselista. Møtedeltaking er avhengig av kva plan som blir lagt fram. Desse regionale instansane er deltakarar i Planforum:

Fylkesmannen i Hordaland (Landbruksavdelinga, Miljøvernavdelinga, Beredskapseininga, Kommunal-og samordningseininga, Justis- og byggjesaksavdelinga, Helseavdelinga)
Fiskeridirektoratet, Region Hordaland
Statens vegvesen, Region vest
Kystverket Vest
Jernbaneverket, Region vest
Avinor
Mattilsynet
Bjørgvin bispedøme
Statsbygg Vest
NVE, Region vest
Forsvarsbygg
Bergvesenet
Hordaland fylkeskommune, Samferdselsavdelinga, Kultur- og idrettsavdelinga, Strategi- og næringsavdelinga