Dei tilsette ved den nye tannklinikken på Stord feira dagen med kaker: Diana P. Henriquez (f.v.), Arne Njøsen, Inger-Margrethe Strøm, Brit H. Laastad, Kirsten Mæhle, Irene Bjelland, Liv Tveit Berg, Halldis Nesbø, Nancy G. Matre, Jane Fjelland, Bahar Dehghan Manshadi, Margareth Råen. (foto: Bjarte Brask Eriksen)
Størst i fylket
Stord tannklinikk er saman med Hesthaugen tannklinikk i Åsane dei største offentlege tannklinikkane i Hordaland. Åtte behandlingsrom er teken i bruk i dei nye lokala med høve til å ta i bruk det 9. ved behov. 400 kvadratmeter fyller tannklinikken, og 10 millionar kroner har det kosta å få alt på plass. 14 tilsette har arbeidsplassen der. Det inkluderer og overtannlegen i Sunnhordland, Torunn Gaarden.
Det mest krøkkete eg har sett
– Gratulerer med ny, fin arbeidsplass. Noko av det mest krøkkete eg har sett, var den gamle klinikken. Det beste vi kunne seie om den, er at den var open og utan stengsel. Denne nye er stengt alle stader. Tidlegare overtannlege Arne Njøsen skal ha æra for den nye klinikken. Han sette prosessen i gang, mens vi har vore hendene som har gjort det praktiske. Det har gått fort og resultatet er heilt fantastisk, sa overtannlege Torunn Gaarden.
Fylkestannlege Arne Åsan klipte snora som opna den nye tannklinikken.
Lyse, friske fargar
Den offisielle opninga skjedde ved at fylkestannlege Arne Åsan klipte over ei snor som var spent over langs luka i venterommet.
– Dette er ein stor dag for Stord tannklinikk, men og ein stor dag for tannhelsetenesta i Hordaland. Det blir kjekt å jobbe i nye og lyse lokale. Det blir lagt merke til at vi har moderne utstyr og lokale i lyse friske fargar. Vi tar og steget framover med universell utforming, sa fylkestannlege Arne Åsan.
Best i klassen
Leiar av opplærings- og helseutvalet, Roald Steinseide, representerte fylkespolitikarane under opninga.
– Dette er ein stor dag for de som jobbar her og for fylkeskommunen. Vi har opna fem vidaregåande skular, og dette er den andre tannklinikken på kort tid. Hordaland fylkeskommune er best i klassen, sa utvalsleiar Roald Steinseide.
Thorleif Askeland har stått for innreiinga og sytt for at alt utstyr er på plass. Her sjekkar han at boret verkar på tannlege Jane Fjelland.
Start i 1967 som folketannrøkt
Den offentlege tannhelsetenesta på Stord vart starta av tannlege Arvid Olsen i 1967 i eit lite lokale i Leirvik. Då var namnet folketannrøkta. 1. januar 1975 flytte tannklinikken ned i Gågata, der den heldt til i upraktiske lokale over to plan. No er endeleg tannklinikken samla på eitt plan i moderne og praktiske lokale. Tannlege Arvid Olsen er no 89 år gammal og deltok i feiringa.
Sentrale personar under opninga: Klinikksjef Margareth Råen (f.v.), overtannlege Torunn Gaarden, tidlegare overtannlege Arne Njøsen, fylkestannlege Arne Åsan, leiar av opplærings- og helseutvalet, Roald Steinseide, Thorleif Askeland hos fylkestannlegen, Arvid Olsen som starta folketannrøkta på Stord i 1967 og Ragnhild Aak Skajaa ved eigedomsseksjonen i Hordaland fylkeskommune.
Klinikksjef Margareth Råen fekk eit måleri i gåve av fylkestannlege Arne Åsan.