Fylkesutvalet i Hordaland rår til at det vert gjeve løyve til utbygging i Samnangervassdraget og Aldalselva, Aldal kraftverk og Frøland småkraftverk, etter alternativ 1.
Vedtaket vart gjort med 12 mot 2 (SV, Sp) røyster.
Det er BKK Produksjon som søkjar om løyve med sikte på å fornya kraftproduksjonen i Samnangervassdraget. Alternativ 1 vil gje 80 GWh ny kraft.
Omsyn til fisk og naturtypar
Då utbygginga gjeld eit vassdrag med laks og sjøaure viser fylkesutvalet til dei fylkespolitiske retningslinene om tiltak for å redusera negativ innverknad, t.d. vurdering av omløpsventil, tilpassa vassføring i gytevandringstida og sikre inntaksordningar for å unngå tap av fisk i turbin. Ved val av deponi og kraftlinetrasear bør ein i størst mogeleg grad ta omsyn til sårbare naturtypar og førekomst av raudlisteartar.
Kulturminne
Om kulturminne seier fylkesutvalet:
- Deponialternativ aust for vegen i Engjaliområdet bør takast ut av planen slik at det ikkje er i konflikt med opplevingsverdi av KM 9, den freda helleren, askeladden id 120768.
- Tilkomstvegen til inntak i Aldalselva bør justerast for å sikre blokkhelleren ved Aldalen som er eit kulturminne av lokal/regional verdi.
- Det vert stilt krav om at undersøkingsplikta etter § 9 i Kulturminneloven vert oppfylt i god tid før iverksetjing av tiltak. Dersom det vert avdekka konflikt med automatisk freda kulturminne, må tiltaka justerast eller eventuelt leggjast fram for Riksantikvaren som rette dispensasjonsmynde.
Forslag som fall:
Magnar Lussand (Sp) sette fram forslag om at fylkesutvalet skulle rå til utbygging etter alternativ 2 med nytt Frøland kraftverk og Frøland småkraftverk som vil gje 27 GWh ny kraft. Forslaget fekk to røyster (Sp, V) og fall.
Sak til fylkesutvalet