Energisparegruppa i Hordaland fylkeskommune diskuterer planane for å få ned straumbruken: Overingeniør Helge Gundersen for energibruk (f.v.), drifts- og vedlikehaldsleiar Roald Orvedal (fylkeskommunen sin representant i arbeidsgruppa med Bergen kommune og Universitetet i Bergen), Karen Louise Nybø, ansvarleg for klimaplanen, driftsleiar Christian Hansen, og eigedomssjef Helge Haavardtun (leiar av styringsgruppa). (foto: Bjarte Brask Eriksen)
Realistisk
– Det er realistisk å greie dette innan 2020 om vi får pengane som er føreslege i budsjettet. Om investeringane i økonomiplanen fram til 2015 blir følgt opp, er vi på god veg. Vi må gjere fysiske tiltak for å redusere energibruken, seier eigedomssjef Helge Haavardtun i Hordaland fylkeskommune.
64 millionar kilowattimar årleg
Fylkeskommunen har 46 vidaregåande skular, 15 kulturbygningar, nærmare 70 tannklinikkar i tillegg til fylkeshuset. Dette omfattar totalt 400.000 kvadratmeter golvflate og eit årleg energiforbruk på 64 millionar kilowattimar.
Hordaland fylkeskommune sparar energi på å bruke fjernvarme frå bossanlegget i Rådalen. Her kjem fjernvarmen inn i fylkeshuset.
Samarbeid for å lære av kvarandre
Reduksjonen i energibruken er forankra i klimaplanen for Hordaland som er vedteken av fylkestinget. Bergen kommune og Universitetet i Bergen har tilsvarande mål som Hordaland fylkeskommune. Dei tre partnarane har inngått samarbeid. Drifts- og vedlikehaldsleiar Roald Orvedal representerer fylkeskommunen i arbeidsgruppa med Bergen kommune og Universitetet.
¬– Vi har inngått samarbeid for å lære av kvarandre. Erfaringsutveksling er viktig. Andre kommunar skal og kunne få erfaring av dette. Vi driv kvarandre og vi er her for kvarandre, seier drifts- og vedlikehaldsleiar Roald Orvedal i Hordaland fylkeskommune.
Kurs i å styre og overvake
Driftspersonell utfører ei viktig rolle innan energisparande tiltak. Tilsette i både fylkeskommunen, kommunen og universitetet har difor vore på kurs for å styre og overvake energibruken i bygningane dei har ansvar for. 48 tilsette på Universitetet og i Bergen kommune og 35 tilsette i fylkeskommunen har vore på kurs i fylkeshuset. I tillegg er det gjennomført kurs for tilsette i distriktet på Voss og Stord.
Driftsleiar Christian Hansen styrer fjernvarmeanlegget som leverer 120 grader varme frå bossanlegget i Rådalen og varmar opp heile fylkeshuset.
Skal ned 20 prosent
I klimaplan for Hordaland er målet å redusere energibruken i bygningar med 20 prosent i høve forbruket i 2007. Universitet i Bergen har som mål å redusere energibruken med 20 prosent innan 2020 basert på forbrukstal frå 2009. I dette ventar Universitetet å spare i snitt to prosent i året. Dessutan skal Universitetet bli det mest miljøvennlege/grøne universitet i Noreg. Bergen kommune sin klima- og energihandlingsplan har som mål å senke den generelle stasjonære energibruken pr innbyggjar i takt med venta vekst i folketalet. Det betyr 1,3 prosent pr år, eller om lag 20 prosent i 2020 rekna ut frå forbruket i dag. Vidare har kommunen som mål at energibruken skal reduserast på den måten at forbruket ikkje aukar over dagens nivå i 2020 eller i 2030.
Skulle straumen gå, startar nødstraumsaggregatet i fylkeshuset automatisk. Det gjev straum for å sikre drifta av vitale delar i fylkesadministrasjonen.