Ny teknologi gir nye moglegheiter for å beskrive turisme

Forumet vert arrangert annakvart år i regi av OECD og Eurostat. Det franske turistministeriet var vertskap i 2008.

Gjennom 32 "papers" og presentasjonar presenterte forskingsinstitusjonar, statistiske byrå og representantar for turiststyresmakter frå mange land resultat frå sitt arbeid med innhenting og bearbeiding av informasjon om turisme.

Fabien Girardin frå MIT (Massachusetts Institute of Technology) la fram sitt paper "Uncovering the presence and movements of tourists from user- generated content". Med illustrasjonar frå fleire turistbyar viser han korleis informasjon om mobiltelefonbruk og bilete som brukarar av fotodelingsnettstaden www.flickr.com har lagt inn frå sine feriereiser, kan utgjere nye kjelder til informasjon om turisme.

Ut frå analyse av turistbilete lagt inn på Flickr kjem det fram at amerikanske og italienske turistar sine foretrekte "ruter" rundt i Roma er forskjellige.

Michel Houée og Claudine Barbier frå turismeforskingsinstituttet ODIT France la fram studien "Estimating foreign visitors flows from motorways toll management systems", om korleis ein kan nytte informasjon frå betaling i bomstasjonar på motorvegar til å samle meir kunnskap om turiststraumane. Ved hjelp av denne informasjonen kan ein m.a. identifisere ulikskapar mellom nasjonalitetar når det gjeld ruter dei køyrer, område dei besøker og årstidsvariasjonar.

Ulf Sonntag frå Institut für Tourismus- und Bäderforschung in Nordeuropa i Kiel orienterte om INTERREG IIIB- prosjektet ToLearn, som skal fremje berekraftig turisme i Nordsjøregionen, og gjenga nokre resultat frå analysar av offisiell turismestatistikk.

Ghislain Dubois drøftar i "Using national tourism demand surveys to assess greenhouse gas emissions from long distance passenger transport", som er utarbeidd av forskarar frå fleire franske universitet og forskingsintitusjonar, korleis ein ved å kombinere statistikk for turistreiser, avstandsmatriser og koeffisientar for CO2- utslepp kan gjere anslag på klimagassutslepp frå langdistanse turistreiser.

Turismen reknast å gi opphav til knapt 5 % verda sine CO2- utslepp. 75 % av utsleppa med opphav i turisme kjem frå transport, 21 % frå overnatting og 4 % frå andre aktivitetar.

Jasna Perko og Marianne Iđaković frå Kroatias statistiske byrå tok for seg "Rise and Fall of Croatian tourism and the effects of the war of the 90's". Frå eit nivå på litt over 10 mill. innan- og utanlandske turistankomstar årleg på siste halvdel av 80- talet, fall dette talet til mellom 2 og 5 mill. i krigsåra 1991-95. Seinare har turismen teke seg gradvis opp og talet på turistankomstar var i 2007 litt høgare enn på 80- talet. Turismen i landet på 80-talet leid under dårleg infrastruktur m.v. Med krigsavbrotet fekk reiselivsnæringane høve til å legge eit nytt og betre grunnlag for turismen.

Ville Vertanen frå det statistiske byrået i Finland orienterte om arbeidet med automatisert innhenting av overnattingsstatistikk direkte frå overnattingsstadene. Frå 2005 har det i Finland vore mogleg å sende informasjon direkte frå hotella sine datasystem til statistikkbyrået sin database. For dei bedriftene som deltek i systemet er arbeidsmengda redusert frå 40+ min per månad til nær 0. For at denne typen system skal kunne gjennomførast bør det ha eit visst omfang. Det vert derfor arbeidd med å utvide systemet til ein nordisk modell. 

- - - - - - -

Alle papers og presentasjonar frå forumet.

Sjå også Fabien Girardin sin bloggartikkel frå forumet.