Foto: Inge Døskeland
I samband med tildelinga av nye løyve til matfisk av laks og aure i 2009 har regjeringa fastsett at vederlaget for løyva skal tilfalle fylkeskommunane som frie midlar. Oppdrettarar i Hordaland fekk tildelt fem løyve, og med 3 mill. kr i vederlag pr. løyve fekk Hordaland tilført 15 mill. kr som eit eingongstilskot. Fylkesutvalet vedtok 21.01.2010 å nytte vederlaget til ei eiga tilskotsordning med sikte på vidare utvikling av dei marine næringane i fylket.
Retningsliner for tildeling
Fylkesutvalet vedtok 16.06.2010 å fordele dei 15 mill. kr med 4 mill. til rekruttering, 4 mill. til arealbruk og lokalisering og 7 mill. til miljøtiltak. Av dei 7 mill. kr som er sett av til miljøtiltak vert 1 mill sett av til tiltak for å fremja villstammen av laks og aure. Vidare skal 1,5 mill. av dei 4 mill. kr som er sett av til arealbruk og lokalisering fordelast direkte til vertskommunane med 300.000 kr pr. konsesjon tildelt i 2009. Fylkesutvalet vert avgjerdsmynde.
Styrking av Hordaland som oppdrettsfylke
Fylket har pr i dag ca 150 løyve for matfiskoppdrett av laks og aure, av totalt ca 970 på landsbasis. Salsverdien av slakta matfisk i Hordaland var om lag 3 mrd i 2008. Dei siste 10 åra har talet på aktørar i Hordaland vorte kraftig redusert (94 i 1999 til 38 i 2009).
Tilskotsordninga skal nyttast til å styrkje Hordaland som oppdrettsfylke. Ordninga skal finansiere tiltak som kan sikre ei berekraftig havbruksverksemd i eit langsiktig perspektiv. Samarbeid med næringsaktørar, kommunar og lokale lag vil vere viktige arbeidsverktøy.
Unikt marint miljø
Hordaland har si framste styrke i eit unikt marint forskings- og undervisningsmiljø med Havforskningsinstituttet, Fiskeridirektoratets ernæringsinstitutt og Universitetet som viktige aktørar i utviklinga av havbruksnæringa.
Som følgje av forvaltningsreforma har fylkeskommunane overteke ansvar for forvaltning av havbruksnæringa. Med ei god forvaltning kan Hordaland fylkeskommune vere med å prege utviklinga
av ei berekraftig næring.
Sviktande rekruttering
Havbruksnæringa har utvikla seg frå enkle anlegg med tre-fire tilsette pr eining til store produksjonsområde med omreisande røktarar og produksjonskoordinatorar. Rekruttering til næringa, spesielt til røktarstillingar, er vanskeleg. Næringa ønskjer kvalifisert arbeidskraft i alle ledd og har fått dette gjennom elevar frå praktisk retta utdanning på vidaregåande nivå og meir teoretisk retta på høgskule-/universitetsnivå.
I dei siste åra har ungdommar som vil ta desse utdanningsvegane minka kraftig, sjølv om næringa treng ny arbeidskraft. Rekrutteringssvikten har vore så stor at det no er fare for at utdanningstilbodet i fylket vert redusert og fleire klassar står i fare for å bli lagt ned.
Miljøpåverknader
Havbruk er ei produksjonsform der miljøpåverknadene under anlegga lar seg måle, men konsekvensane elles er vanskelege å overvake. Norsk havbruksnæring i dag har særskilde utfordringar med omsyn til sjukdom, lakselus og omdømme. Utfordringane må handsamast i regionalt perspektiv.
Miljøtiltak for å berga villaksen
Den kanskje største veikskapen for Hordaland som havbruksfylke er den omfattande produksjonen over eit relativt lite areal. Situasjonen for villaks og sjøaure i Hordaland er så alvorlig at alle elvane er stengt for fiske i håp om å berge bestandane. Situasjonen skyldes fleire faktorar, men påverknad frå havbruk er eit stort trugsmål.
Arealbruk og lokalisering
Oppdaterte planar for kystområda er viktige verktøy for kommunane i utvikling av ei berekraftig havbruksnæring. Kystkommunane har eit nasjonalt ansvar for å leggje til rette for havbruksnæringa, mellom anna gjennom arbeid med arealplanar. Oppdrettarane er avhengige av at kommunane har sett av areal, og at arealet er stort nok.
Les meir om arealplanar og miljøtiltak som tema for tilskotsordninga
Søknad og administrasjon
Søknader og rutinar for kvalitetssikring og tildeling vil bli handtert av Regionalavdelinga. Utfyllande informasjon om retningsliner og søknadsprosedyrar vil bli offentleggjort seinare.
Retningsliner for marin tilskotsordning - sak i fylkesutvalet 16.06.2010