Med høveleg utstyr blir det jakta på rømt oppdrettslaks i Hardangerfjordvassdraga. (foto: Svein-Helge Pedersen)
Sameksistens
Vel fire millionar kroner skal over tre år brukast på Vosso-prosjektet. Det skal gjennomførast tiltak for å fremje sameksistens mellom havbruksnæring i Osterfjord-systemet og villaksen i Vosso-vassdraget. Eit av hovudmåla er å koordinere samarbeid mellom interessentane i området.
Bøte på skadeverknadene
Prosjektet skal bøte på skadeverknadene av havbruk på villfisk. Prosjektet har vore i drift sidan 2010, mellom anna med støtte frå regionalt utviklingsprogram i Hordaland fylkeskommune. Eit resultat er at villaksen er attende i Vosso-vassdraget.
Levande og lusefri
Stønaden til å redde Vosso-laksen blir fordelt over tre år: 1,8 millionar kroner i år, 1,5 millionar neste år og 830.000 kroner i 2013. Totalkostnaden er over 10 millionar kroner. Prosjektet er eit samarbeid mellom villfiskinteressene, forvaltninga og oppdrettsnæringa i Hordaland. Smolt blir klekt ut i klekkeri og frakta i store tankar ut fjorden, slik at den kjem levande og lusefri til havs. I haust har dette ført til det største tilsiget av villaks sidan 1980-talet.
Tømme elvane for oppdrettslaks
375.000 kroner går til Hardangerfjord villfisklag. Pengane skal brukast til å tømme elvane for oppdrettslaks og går til å utruste fire lokale grupper med høveleg utstyr. Desse lokale gruppene er lokalisert i Etne, Odda, Kvam og Granvin. Pengane er mellom anna brukt til å kjøpe dykkarutstyr og harpun.
Glad for støtte
– Vassføringa har så langt i haust gjort det svært vanskeleg med kartlegging og uttak av oppdrettslaks. Men vi vonar på mindre nedbør og kaldare ver, slik at vasstanden kjem på eit meir handterleg nivå. Det vil gje oss høve til å fjerne oppdrettslaks frå gyteplassane på ein effektiv måte med nytt utstyr, seier Svein-Helge Pedersen i Hardangerfjord villfisklag. Han er svært nøgd med at Hordaland fylkeskommune har finansiert prosjektet 100 prosent.
Utbetre laksetrapp
Etne elveeigarlag har fått 265.000 kroner. Pengane går til å utbetre laksetrappa i Håfoss. Dette vil gje villaksen tilgang til verdifulle gyteområde og auke smoltproduksjonen i vassdraget. For å følgje med på kor mykje laks som kjem opp til gyteområdet, skal elveeigarlaget installere videoutstyr med fisketeljar i øvre del av laksetrappa. Prosjektet er 100 prosent finansiert av Hordaland fylkeskommune.
Pott på 15 millionar kroner
Pengane kjem frå ein pott på 15 millionar kroner som Hordaland fylkeskommune har fått som eingongstilskot i samband med tildeling av nye løyve for matfisk av laks og aure i 2009. Tilskotsordninga skal brukast til vidare utvikling av dei marine næringane i fylket.