Bakgrunn
Hordaland fylkeskommune er styresmakt for tildeling av akvakulturløyve etter akvakulturlova. Hausten 2009 utlyste Fiskeri- og kystdepartementet ein nasjonal søknadsrunde for tildeling av oppdrettsløyve. Departementet sette prisen for kvart løyve til åtte millionar kroner. Av desse blei tre millionar per løyve overførte til kommunane som fekk nye konsesjonar. I Hordaland fekk fem verksemder tildelt kvar sitt løyve, og Hordaland fylkeskommune fekk overført totalt 15 millionar kroner frå staten.
Pengane blei gitt utan føringar frå staten. Fylkesutvalet har vedtatt å nytte vederlaget til å opprette ei eiga tilskotsordning med sikte på vidare utvikling av dei marine næringane i fylket.
Formål
Tilskotsordninga er på plass frå 1.1.2011 og har følgjande hovudformål:
- å fremje rekruttering til havbruksnæringa
- å leggje til rette for betre arealbruk for havbruksnæringa
- å stimulere til miljøtiltak for å redusere skadeverknadane frå havbruk
Midlane skal nyttast til å finansiere tiltak og prosjekt som kan fremje ei berekraftig havbruksverksemd i eit langsiktig perspektiv.
Fylkesutvalet vedtok 16.06.10 at midlane skal fordelast slik: fire mill kroner til rekruttering, fire mill kroner til arealbruk og lokalisering og sju mill kroner til miljøtiltak (ein million er øyremerkt tiltak for å fremje villstammen av laks og aure).
Søknad
Midlane til miljøtiltak skal administrerast til eksterne prosjekt gjennom ”Marin tilskotsordning i Hordaland”. Det er lagt opp til årlege søknadsrundar, den første med søknadsfrist 1. mars 2011.
No etterlyser Hordaland fylkeskommune enkeltpersonar, verksemder, lag og foreiningar med meir, som har konkrete forslag til gode miljøtiltak. Fylkeskommunen har sju millionar kroner til utdeling. Det er lagt opp til årlege søknadsrundar med utbetaling av tilskot.
Regionalavdelinga ved Hordaland fylkeskommune tek imot søknader om tilskot, handsamar desse og gjer ei prioritering. Avgjerdsmynde for tildelingane er lagt til fylkesutvalet.
For meir informasjon:
Sjå også: fylkesutvalsak og endringsforslag
Kontakt lars.andresen@post.hfk.no
Søknaden sendast til:
Hordaland fylkeskommune
Klima- og naturressursseksjonen
Pb 7900
5020 Bergen