Energi - politiske vedtak

Fylkesdelplan for små vasskraftverk vedteke i fylkestinget

Som første fylke i landet har Hordaland vedteke ein fylkesdelplan for små vasskraftverk. Målsetting med planarbeidet har vore å samle kunnskap om regionale og nasjonale verdiar i mogelege utbyggingsområde for å betre grunnlaget for veging av verdiar/interesser og vurdering av sumverknader i småkraftsaker. I tillegg til å utarbeide fylkespolitiske retningsliner for å sikre at ny fornybar energiproduksjon i små-, mini- og mikrokraftverk ikkje fører til tap av naturmangfald, friluftslivsområde eller landskap av stor verdi. Fylkestinget sitt vedtak 9.desember 2009 i sak 82/09 kan ein lese her. For tilgang på plandokument, fylkespolitiske retningsliner og kartmateriale : Les meir

Energiplan

Hordaland har tilgang på store energiressursar, og desse er utgangspunkt for mange viktige verksemder i fylket. Fylkesdelplan for energi 2001-2012 danna grunnlaget for regional energipolitikk, og med mål og retningsliner for energiutviklinga i fylket. I samband med fylkesdelplan for vindkraft 2000-2012 vart det gjort ein arealanalyse om vindtilhøve og konfliktpotensiale.
Ei evaluering av energiplanen vart lagt fram for fylkesutvalet i sak 75/09. Oppjustert talmateriale vart nytta i arbeid med klimaplan for Hordaland.  I samband med klimaplanarbeidet vart energimåla for fylket oppjustert, og klimaplanen erstattar no energiplanen på dette feltet. 

Olje og gass

Olje- og gassverksemd representerar særs viktige næringar i fylket. Gjennom HOG-Energi arbeider ein særleg for å styrke industriell utnytting av naturressursane på norsk sokkel, og legge til rette for utvikling av fornybar energi i eit miljøvenleg perspektiv.

Småkraftverk

I perioden 2006-2008 gav prosjektet "Småkraftverk i Hordaland" i regi av Landbruksavdelinga hos Fylkesmannen råd og støtte til grunneigarar som vurderer bygging av småkraftverk. Fylkeskommunen løyvde kr 600.000,- frå regionalt utviklingsprogram til prosjektet, som har vore gjennomført i samarbeid med kommunar og kraftselskap. Avslutningsseminar vart halde i Samnanger i mars 2009 med Olje- og energiministeren som innleiar. Frå 2009 har Samnanger kommune overteke prosjektet med mål om oppretting av eit kompetansesenter for småkraft. Meir om dette på nettstaden www.kraftsenteret.no.

Kraftliner 

300(420)kV Kollsnes -Mongstad

Fylkesutvalet kravde kabling av BKK sin omsøkte kraftline frå Kollsnes til Mongstad ved to høyringsrundar i 2011.

Meir om høyring av NVE si innstilling ved fylkesutvalet si handsaming i mai 2011.
Meir om høyring av tilleggsutgreiing ved fylkesutvalet si handsaming i november 2011.

420 kV Sima-Samnanger

Fylkestinget i Hordaland vedtok 11. juni 2008 å klaga på NVE sitt vedtak om konsesjon for 420kV luftline frå Sima til Samnanger og gav fylkesutvalet i oppdrag å utforma klagen.  Vedtak og sak kan ein lese her.