– Economuseea har fått eit stort internasjonalt, nordisk og nasjonalt løft, seier prosjektleiar Terje Inderhaug i Hordaland fylkeskommune i det nyopna economuseet Stine Hoff kunstglass nær Troldhaugen i Bergen.
Stolt og glad
Prosjektleiar for det internasjonale economusee-prosjektet, Terje Inderhaug i Hordaland fylkeskommune er stolt og glad.
– Vi kan trygt si at economusee-prosjektet har fått eit stort internasjonalt, nordisk og nasjonalt løft. Dei første economuseea har materialisert seg. Dei blir marknadsført som nye opplevingstilbod, og dei blir i aukande grad sett på som eit sers bra reiselivsprosjekt i alle samarbeidslanda, seier Inderhaug.
Lærerik og interessant oppleving
Målet med economusee er å marknadsføre og halde i live tradisjonelle handverksfag og ta vare på handboren kunnskap. Ei verksemd som blir economusee, opnar dørene for publikum og byr på lærerik og interessant oppleving. Til no er fem economusee opna i Noreg. Dei tre første var Aurlandsskoen i Sogn, Oselvarverkstaden på Osøyri og Fjordtønna i Tyssa. Dei to siste economuseea er nettopp opna i Hordaland og alle er opne i heile sommar. Det er Treskjerartunet på Voss og Stine Hoff kunstglass i Bergen, nær Troldhaugen. Offisiell opning skjer til hausten.
Turisme i Norden
Nordisk Ministerråd har publisert ein inspirasjonsbok for regional utvikling knytt til turisme. I boka blir economuseea omtala som det beste døme på turisme-prosjekt i Norden. Og det er ein rollemodell for regional utvikling knytt til turisme. Boka skal bli eit verktøy for berekraftig utvikling av mellom anna reiselivet i utkantområda i Norden. Boka blir publisert både i trykt form og på nettsidene til Nordisk Ministerråd i sommar.
Beste turistprosjekt i Nord-Irland
Torsdag 26. mai vart economusee-prosjektet i Nord-Irland kåra til eitt av dei to beste nye turist-prosjekta i Nord-Irland i 2011. Utnemninga kom av den nordirske ministeren for næring og turisme, Arlene Foster, under ei gallaførestelling i Belfast.
Butikk med sal av produkt
Eit economusee viser produksjon, design og oppleving i seks steg: I resepsjonen blir handverket og handverkarane presentert. I produksjonslokalet får vi sjå handverkarane i arbeid. I utstillingsområdet får vi historia bak produksjonen og design. I dokumentasjonsdelen kan ein lære meir om faget og sjå handverkslitteratur, og til slutt er det ein butikk med sal av produkt.
Start i Canada
Ideen til economusee kjem frå Canada der konseptet er solid utprøvd med eit levande nettverk av rundt 50 slike verksemder. EU har satsa på å byggje opp eit liknande nettverk i Europa der Terje Inderhaug i Hordaland fylkeskommune er prosjektleiar.
Informasjonsbrosjyre med omtale av prosjektet og dei fem economuseea på Vestlandet er lagt ut i resepsjonen i 1. etasje i fylkeshuset i Bergen.
Brosjyre (pdf)
Oselvarverkstaden på Osøyri
Fjordtønna i Tysse