Fylkesrådmann Paul M. Nilsen (f.v.) var ordstyrar då fylkesmann Lars Sponheim, ekspedisjonssjef Jarle Jensen i Miljøverndepartementet og fylkesvaraordførar Mona Hellesnes innleia på plankonferansen for Hordaland. (foto: Bjarte Brask Eriksen)
Fylket skrik etter styring
Den nye plan- og bygningslova kom for to år sidan. Den meiner Sponheim er ein viktig styringsreiskap.
– Planlegging er styringsverktøyet vårt. Har vi ikkje vilje til å styre, kan vi heller ikkje planleggje. Plan- og bygningslova fekk brei tilslutning i Stortinget. Den viser at det er vilje til å styre. I Bergensområdet skal vi planleggje for ein folkevekst på 160.000. God planlegging er heilt avgjerande, og planen føreset styringvilje. Fylket skrik etter behov for styring. Fylkeskommunen må ta i bruk planverktøy, sa Lars Sponheim.
Hordalandssjuke
Fylkesmannen innførte det nye omgrepet Hordalandssjuke.
– Det motsette til planlegging er dispensasjon. Vi har ein Hordalandssjuke med dispensasjonar, heile 1600 i fjor. Eg skulle gjerne sett at det var ingen. Utbygging skal gå gjennom plan og ikkje gjennom dispensasjon. Men det ser betre ut i år. Til no har vi 1222 dispensasjonar. Det går i rett retning, sa fylkesmann Lars Sponheim.
Plan for planlegginga
Fylkesvaraordførar Mona Hellesnes gler seg over eit splitter nytt planverktøy: Kommunal planstrategi og regional planstrategi.
– Strategiane skal føre til at planlegging skal forankrast betre politisk. Planinitiativ skal ikkje vere ad hoc-prega og lite koordinert. No skal det lagast ein “plan for planlegginga”. Kommunane får lov til å godkjenne strategien sjølv. Vi på fylkesnivået må ha regjeringa si velsigning.
Oppglødd fylkeskommune
Hellesnes peika på at fylkeskommunen var så oppglødd for denne planreiskapen at dei tjuvstarta og vedtok ein strategi alt i 2010.
– I den er det åtte prioriterte planar som vi no held på med å utarbeide. Vi er i gang med å førebu neste strategi, og vi skal snart setje i gong kanskje ei av dei mest krevjande planoppgåvene i Hordaland på lenge: Regional plan for utbyggingsmønster, arealbruk og transport i Bergensområdet. Hittil har vi jobba med forankring i kommunar og statlege organ. No skal vi arbeide fram eit planprogram der dei viktigaste utfordringane blir fanga opp. Eg er glad for at fylkeskommunen no kan ta fatt på utfordringane slik at vi kan handtere den forventa folkeveksten på heile 160.000 i denne regionen på ein god og berekraftig måte, sa fylkesvaraordførar Mona Hellesnes.
Betre samspel
Ekspedisjonssjef Jarle Jensen i Miljøverndepartementet er svært nøgd med den nye plan- og bygningslova.
– Dei som jobbar med planlegging er med på å bestemme korleis landet skal sjå ut. Med den nye lova har vi fått eit meir heilskapeleg plansystem. Før var det meir tilfeldig og ikkje lett å vite kva som var prioriterte verkemiddel. No får vi betre samspel, sa ekspedisjonssjef Jarle Jensen.
Tilskipar
Plankonferansen for Hordaland vart skipa til 7. og 8. november på Radisson Blu Hotel Norge i Bergen og samla nærmare 250 deltakarar. Tilskipar var Fylkesmannen i Hordaland og Hordaland fylkeskommune.