På den årlege næringskonferansen deltok mellom anna fylkesordførar Torill Selsvold Nyborg (f.v.), årets gründerkvinne Silje Vallestad, næringssjef i Hordaland Mette Nora Sætre, og næringsrådgjevar Jon-Erik Vollan i Hordaland fylkeskommune. (foto: Bjarte Brask Eriksen)
Ein million koner i premie
Det er Innovasjon Norge og Nærings- og handelsdepartementet som kårar Årets gründerkvinne. Tildelinga til Silje Vallestad skjedde 8. mars og premien på ein million kroner vart overrekt av nærings- og handelsminister Trond Giske. På næringskonferansen fortalde Vallestad om ideen sin. Dataprogrammet kan mellom anna nyttast til å styre kor mykje pengar barna bruker gjennom mobiltelefonen. Ein kan og finne ut kvar barna er.
252 gasellar i Hordaland
Den årlege næringskonferansen er ein nyttig møteplass for næringsutvikling i Hordaland. Etter ein periode med finanskrise, konsolidering og omstrukturering, er det no vekst innanfor dei fleste delane av næringslivet i fylket. Eitt av hovudtema på konferansen var vekstbedrifter. Redaktør i Dagens Næringsliv, Amund Djuve, fortalde om Gasellane, som han meiner er dei viktigaste bedriftene i Hordaland. Dagens Næringsliv lanserte omgrepet ”gaselle” i 2002. Det er bedrifter som minst har dobla omsetnaden dei siste fire åra, har hatt minst ein million kroner i omsetnad det første året, skal ha positivt samla driftsresultat og unngått negativ vekst i perioden. I fjor var det heile 252 slike bedrifter i Hordaland.
Sosial entreprenørar
Eit anna tema på konferansen var sosialt entreprenørskap. Dette handlar om å starte ei bedrift som skal løyse eit sosialt problem som miljø, utdanning, helse, menneskerettar eller økonomisk utvikling. Sosiale entreprenørar nyttar metodar og verktøy frå forretningsverda for å gjere verda litt betre. Det norske industri- og finanskonsernet Ferd har gjort noko konkret på dette området og viste korleis dei skapar varige verdiar og set tydeleg spor etter seg i eit lokalsamfunn.
100 deltakarar
Næringskonferansen vart skipa til av Hordaland fylkeskommune på Hotel Radisson Blu Bryggen i Bergen og samla 100 deltakarar frå offentlege verksemder og det private næringslivet.
100 personar frå det offentlege og private deltok på næringskonferansen.