Regionale og lokale kulturbygg

Den desentraliserte tilskotsordninga skal tilførast om lag 40% av den delen av spelemiddeloverskotet som skal nyttast til kulturbygg. Forvaltninga av tilskotsordninga er i brev av 26. oktober 2004 frå Kultur- og kyrkjedepartementet delegert til fylkeskommunane.
 
Dei resterande 60% skal fordelast av Kultur- og kyrkjedepartementet som tilskot til regionale møteplassar og formidlingsarenaer for kultur.
 
Departementet har gjeve signal om at tiltak kan motta stønad frå både den sentrale og den desentraliserte ordninga.
 
Tildelinga for 2009 vil vera klår medio mai 2009.
 
Søknadsfristar
Søknad om tilskot skal fremjast gjennom den kommunen der kulturhuset skal liggja. Kommunen fastset frist for innsending av søknader til kommunen. 
 
Nytt i 2009 er at alle søknader om tilskot skal registrerast elektronisk. Søknad skal registrerast i idrettsanlegg.no, saman med alle relevante vedlegg. Registrering av søknad og vedlegg må gjerast innan 15. mars 2009. Kommunen sin prioritering kan sendast elektronisk (e-post) eller per brev.  

Fylkeskommunal prioritering
Fylkeskommunane er gjeve eit vidt handlingsrom for disponeringa av desse midlane, dvs. at Hordaland fylkeskommune kan velja å prioritera lokale og regionale kulturhus i samsvar med tidlegare praksis eller å utvida feltet til slik det vart skissert i kulturmeldinga (St. meld. nr. 48 (2002-2003).
 
Ettersom den desentraliserte ordninga er tilført få midlar, vil Hordaland fylkeskommune i 2009 ikkje utvida ordninga til å omfatta nye tiltaksfelt å formulera konkrete satsingsområde. For tildelinga i 2009 vil Hordaland fylkeskommune såleis følgja dei eksisterande retningslinene. 
 
Vilkår for tilskot
Hordaland fylkeskommune legg følgjande kriteria til grunn for fordeling av spelemidlar til desentralisert ordning for tilskot til kulturhus:
 
· Kommunal prioritering
· Kvaliteten på søknaden
· Tidspunkt for fyrste gong søkt kulturhusmidlar.
· Søknadsmassen frå dei einskilde kommunane.
· Innbyggjartal i kommunane.
· Det er sett ei maksgrense på tildeling på kr 500.000 pr. år slik at fleire kommunar kjem med i tildelinga.
· Samla tilskot er avgrensa til kr 1.000.000.
· Søknadar som får tildeling i 2009 på delar av godkjent søknadssum får ikkje automatisk dekt restbeløpet dei komande åra då utviklinga av dei økonomiske rammene for tilskotsordninga er ukjende.
 
Lokala skal planleggjast ut frå definerte behov og dei bør vera fleksible. Kulturhusa bør lokaliserast sentralt i lokalsamfunnet/regionen.
 
Lokala skal vera opne for all lovleg kulturverksemd. Ingen må stengjast ute av religiøse, sosiale eller politiske omsyn.
  
Føremål
Tilskota skal medverka til eigna lokale og bygningar som gjev rom for ulik kulturell verksemd. Bygningane skal fungera som kulturelle møtestader for lokalmiljø og/eller region.
 
Midlane kan nyttast til nybygg, ombygging og modernisering av kulturhus, men ikkje til ordinært vedlikehald eller drift. 
   
Utforming
Byggjeprosjekt det vert gjeve tilskot til skal gjennomførast i tråd med gjeldande føresegner i plan- og bygningsloven. Fylkeskommunen vil sjå til at bygga vert utforma i tråd med føremåla.
 
Kvalitetssikring av planane
Planane må kvalitetssikrast med omsyn til funksjonalitet og teknisk godkjennast av kommunen. Hordaland fylkeskommune kan gje førehandsuttale. Fylkeskommunen vil henta inn fråsegn frå fagleg hald om naudsynt.
 
Tilkomst for funksjonshemma
Det skal leggjast til rette for tilkomst for funksjonshemma både ved nybygging og ombygging av kulturhus. Krav til utforming er nærare spesifisert i kap. X ”Brukbarhet”  i forskrift 22. januar 1997 nr. 33 om krav til byggverk og produkter til byggverk (TEK) med tilhøyrande rettleiar. Tips og råd finn de og i rettleiaren "Universell utforming av idretts- og nærmiljøanlegg" (KKD 2008).
 
Estetisk utforming
Kulturhuset skal ha ei god estetisk utforming i samsvar med bygningens funksjon og med respekt for bygde og naturgjevne omgjevnader.
 
Bruk
Kulturhus som får tilskot skal verta nytta til kulturføremål i minst 20 år etter at midlane er betalte ut. Dersom bruken av huset vert endra, vil Hordaland fylkeskommune krevja tilskotet attende.
 
Satsar for tilskot
Tilskot kan utgjera inntil 1/3 av godkjende prosjektkostnader for kulturhuset avgrensa til kr 1 million. Ved samlokalisering med andre føremål skal det gjerast ei kostnadsdeling av fellesareal og sambruksareal.

For 2008 vart Hordaland fylkeskommune tildelt kr 3.946.512,-
 
Formkrav
Søknaden må innehalda opplysningar om:
 
· funksjon, aktivitetar, behovsunderlag og søkjar
· teikningar med tilhøyrande omtale av prosjektet
· detaljert kostnadsoverslag
· dokumentasjon på gjennomførings- og fullfinansieringsansvar
· framdriftsplan
· finansieringsplan
· eigaransvar
· driftsfinansiering og plan for forvaltning, drift og vedlikehald
 
Utbetaling
Hordaland fylkeskommune vil betala ut til prosjekt i samsvar med framdrift og likviditetsbehov. Sluttutbetaling skjer etter ferdigattest og revidert rekneskap. Inntil revidert rekneskap ligg føre vil Hordaland fylkeskommune halda tilbake minst 10 pst. av tilskotsmidlane.
 
Sentrale midlar (60 % ordninga)
I samband med handsaminga av budsjettinnstillinga (Innst. S. nr. 2 (2004-2005) vart følgjande påpeika av familie- kultur- og administrasjonskomiteen:
 
”Flertallet vil klargjøre at prosjekter med status som allmenne lokale/regionale kulturbygg, etter vedtatt fylkeskommunal plan, skal kunne søke tilskudd av spillemidler direkte fra Kultur- og kirkedepartementet og få tilskudd av andelen avsatt til  "regionale møteplasser og formidlingsarenaer for kultur" (60 pst.-ordningen)”.
 
Det har vore dialog mellom departementet og Hordaland fylkeskommune når det gjeld tildeling frå denne tilskotsposten.  
 
Vi minner igjen om at søknad skal leverast elektronisk gjennom det nye anleggsregisteret idrettsanlegg.no. Det har vore gjennomført fleire kurs i løpet av hausten 2008 i regi av fylkeskommunen og alle kommunane skal ha personar med kompetanse på elektronisk registrering.