Fylkeskommunen er inne i ei stor satsing på å vidareutvikle den vidaregåande skulen. Ein del av dette er bygging av nye skular og ombygging/utbygging av eksisterande skular. No er det mellom anna bygging av Nordahl Grieg videregående skole på Sørås og Amalie Skram videregående skole på Nygårdstangen som er i prosjektfasen. Denne utbygginga krev også at ein set klarare fokus på ordninga med kunstnarleg utsmykking. Hordaland fylkeskommune sine reglar for kunstnarleg utsmykking av fylkeskommunale bygg var sist revidert i 1987. I vår har ei revidering og nye prosedyrar for området vore til politisk handsaming i ulike utval og til sist i Fylkestinget i juni. Eigedomsseksjonen i samarbeid med Kultur- og idrettsavdelinga har utarbeidd forslag til nytt reglement for Kunstnarleg utsmykking av Hordaland fylkeskommune sine bygg som er oppdatert og tilpassa retningslinene for kunstproduksjon frå KORO (tidlegare Utsmykkingsfondet).
Det skal no settast av 1,2 % av entreprisekostnaden til kunstproduksjon for nybygg og større tilbygg som fylkeskommunen skal stå som eigar av.
Det er no vedteke å auke løyvinga til kunstnarleg utsmykking frå 0,5 –1,0% til 1,2% av entreprisekostnadene for nybygg og større tilbygg. Dette også fordi dei fleste fylkeskommunale bygg, slik som dei vidaregåande skulane har mange brukarar og stort offentleg tilgjenge.
Prosedyren skal kvalitetssikre ansvarsfordelinga og framdrifta i kvar enkelt utsmykkingssak.
I den politiske handsaminga av saka var det også bedd om at administrasjonen lager ei eiga sak der ein ser på ulike ordningar, til dømes fond, som kan opprettast for utsmykking av eldre fylkeskommunale bygg. Dette vil det bli jobba med til hausten.
På grunnlag av egne budsjetterte midlar kan Hordaland fylkeskommune søke tilskot frå Kunst i offentlig rom – KORO. KORO kan gi tilsegn med inntil ein tredjedel av det totale kunstbudsjettet. Det krev at mottakar føljer gitte reglar. Difor legg vi våre retningsliner og prosedyrar tett opp til dei statleg vedtekne retningslinene.
Hordaland kunstsenter er KORO sin regionale samarbeidspartnar, og difor Hordaland fylkeskommune sin næraste samarbeidspartnar i utsmykkingssaker.
Planlegginga av Nordahl Grieg videregående skole er no i den fasen at eit oppnemnd kunstutval jobbar med saka og det er no utlyst prekvalifisering til konkurranse med frist 1. september.