Regionale og lokale kulturbygg

Den desentraliserte tilskotsordninga skal tilførast om lag 40% av den delen av spelemiddeloverskotet som skal nyttast til kulturbygg. Forvaltninga av tilskotsordninga er i brev av 26. oktober 2004 frå Kultur- og kyrkjedepartementet delegert til fylkeskommunane. Dei resterande 60% er til no fordelt av Kultur- og kyrkjedepartementet som tilskot til regionale møteplassar og formidlingsarenaer for kultur.
 
Departementet har gjeve signal om at tiltak kan motta stønad frå både den sentrale og den desentraliserte ordninga.
 
Tildelinga for 2010 vil vera klar i løpet av august 2010.
 
Søknadsfristar
Søknad om tilskot skal fremjast gjennom den kommunen der kulturhuset skal liggja. Kommunen fastset frist for innsending av søknader til kommunen.
 
Søknadene, vedlagt innstilling frå kommunen, må sendast vidare til Hordaland fylkeskommune, Kultur- og idrettsavdelinga, innan 15. mars 2010.
 
Søknadene skal handsamast og prioriterast av Hordaland fylkeskommune. Det er kulturdepartementet som er klageinstans for vedtak treft av fylkeskommunen. 

Fylkeskommunal prioritering
Fylkeskommunane er gjeve eit vidt handlingsrom for disponeringa av desse midlane, dvs. at Hordaland fylkeskommune kan velja å prioritera lokale og regionale kulturhus i samsvar med tidlegare praksis eller å utvida feltet til slik det vart skissert i kulturmeldinga (St. meld. nr. 48 (2002-2003).
 
Ettersom den desentraliserte ordninga er tilført få midlar, vil Hordaland fylkeskommune ikkje utvida ordninga til å omfatta nye tiltaksfelt og formulera konkrete satsingsområde. For tildelinga i 2010 vil Hordaland fylkeskommune følgja dei reviderte retningslinene for forvaltning av desentralisert ordning for tilskot til kulturbygg. Reviderte retningsliner finn du her.  
 
Vilkår for tilskot
Hordaland fylkeskommune legg følgjande kriteria til grunn for fordeling av spelemidlar til desentralisert ordning for tilskot til kulturhus:
 
· Kommunal prioritering
· Kvaliteten på søknaden
· Tidspunkt for fyrste gong søkt kulturhusmidlar.
· Søknadsmassen frå dei einskilde kommunane.
· Innbyggjartal i kommunane.
· Det er sett ei maksgrense på tildeling på kr 500.000 pr. år slik at fleire kommunar kjem med i tildelinga.
· Samla tilskot er avgrensa til kr 1.000.000.
· Søknadar som får tildeling i 2010 på delar av godkjent søknadssum får ikkje automatisk dekt restbeløpet dei komande åra då utviklinga av dei økonomiske rammene for tilskotsordninga er ukjende.
 
Lokala skal planleggjast ut frå definerte behov og dei bør vera fleksible. Kulturhusa bør lokaliserast sentralt i lokalsamfunnet/regionen.
 
Lokala skal vera opne for all lovleg kulturverksemd. Ingen må stengjast ute av religiøse, sosiale eller politiske omsyn.

Kulturdepartementet sine retningsliner for forvaltning av desentralisert ordning for tilskot til kulturbygg er justerte når det gjeld mellom anna vilkår. Vilkåret "kostnadsoverslag" er endra til "prosjektbudsjett". Her skal avsetningar til kunst, "usikkerhet" og reserve takst med. 
  
Føremål
Tilskota skal medverka til eigna lokale og bygningar som gjev rom for ulik kulturell verksemd. Bygningane skal fungera som kulturelle møtestader for lokalmiljø og/eller region.
 
Midlane kan nyttast til nybygg, ombygging og modernisering av kulturhus, men ikkje til ordinært vedlikehald eller drift. 
   
Utforming
Byggjeprosjekt det vert gjeve tilskot til skal gjennomførast i tråd med gjeldande føresegner i plan- og bygningsloven. Fylkeskommunen vil sjå til at bygga vert utforma i tråd med føremåla.

Departementet sine retningsliner for tilskot til kulturbygg er justerte også når det gjeld føremål: utearena for kulturell verksemd er no i tillegg omfatta av føremålet.
 
Kvalitetssikring av planane
Planane må kvalitetssikrast med omsyn til funksjonalitet og teknisk godkjennast av kommunen. Hordaland fylkeskommune kan gje førehandsuttale. Fylkeskommunen vil henta inn fråsegn frå fagleg hald om naudsynt.
 
Tilkomst for funksjonshemma
Det skal leggjast til rette for tilkomst for funksjonshemma både ved nybygging og ombygging av kulturhus. Krav til utforming er nærare spesifisert i kap. X ”Brukbarhet”  i forskrift 22. januar 1997 nr. 33 om krav til byggverk og produkter til byggverk (TEK) med tilhøyrande rettleiar. Tips og råd finn de og i rettleiaren "Universell utforming av idretts- og nærmiljøanlegg (KKD 2008). Nye krav til universell utforming i dne nye plan- og bygningslova må bli følgd.
 
Estetisk utforming
Kulturhuset skal ha ei god estetisk utforming i samsvar med bygningens funksjon og med respekt for bygde og naturgjevne omgjevnader.
 
Bruk
Kulturhus som får tilskot skal verta nytta til kulturføremål i minst 20 år etter at midlane er betalte ut. Dersom bruken av huset vert endra, vil Hordaland fylkeskommune krevja tilskotet attende.
 
Satsar for tilskot
Tilskot kan utgjera inntil 1/3 av godkjende prosjektkostnader for kulturhuset avgrensa til kr 1 million. Ved samlokalisering med andre føremål skal det gjerast ei kostnadsdeling av fellesareal og sambruksareal.

Departementet sine nye retningsliner for tilskot seier at for søkjarar som har krav på refusjon av meirverdiavgift skal den delen av tilskotet på 1/3 bli rekna ut frå kostnadane til prosjektet, med fråtrekk av meirverdiavgifta.

For 2009 hadde Hordaland fylkeskommune kr 4.356.000 til fordeling. 
 
Formkrav
Søknaden må innehalda opplysningar om:
 
· funksjon, aktivitetar, behovsunderlag og søkjar
· teikningar med tilhøyrande omtale av prosjektet
· detaljert kostnadsoverslag
· dokumentasjon på gjennomførings- og fullfinansieringsansvar
· framdriftsplan
· finansieringsplan
· eigaransvar
· driftsfinansiering og plan for forvaltning, drift og vedlikehald
 
Utbetaling
Hordaland fylkeskommune vil betala ut til prosjekt i samsvar med framdrift og likviditetsbehov. Sluttutbetaling skjer etter ferdigattest og revidert rekneskap. Inntil revidert rekneskap ligg føre vil Hordaland fylkeskommune halda tilbake minst 10 pst. av tilskotsmidlane.

Tilsegn om tilskot kan gjelda i inntil tre år.
 
Sentrale midlar (60 % ordninga)
I samband med regionsreforma, er det endringar i forvaltninga av tilskot til regionale møteplassar og formidlingsarena for kultur. Informasjon om forvaltninga av denne ordninga vil Hordaland fylkeskommune kome attende til. 
 
Søknadsskjema
Søknad om tilskot til kulturbygg frå den desentraliserte ordninga skal gjerast elektronisk gjennom kulturdepartementet sitt anleggsregister idrettsanlegg.no. Informasjon om anleggsregisteret vert gjeve av kulturkonsulenten i dei respektive kommunane.

Kontakt Hordaland fylkeskommune om du har spørsmål til tilskot til lokale og/eller regionale kulturbygg.