Kultur- og ressursutvalet i Hordaland gjev både ros og ris til Lindås kommune for den nye kommuneplanen for perioden 2011 – 2023. Kommunen får ros fordi planen er banebrytande innan utbyggingsstrategi, næringsutvikling, landskap og strandsoneforvaltning, men får og ris fordi planen ikkje er tilpassa havbruksnæringa sine behov.
Motsegn
Kultur- og ressursutvalet vil be om at saker i landbruks-, natur- og friluftsområde (LNF) med løyve til spreidd næring og busetnad vert oversendt til vurdering i samband med både eksisterande kulturminne og potensial for funn av nye kulturmine. Kultur- og ressursutvalet fremjar motsegn til dette punktet.
Freda kyrkjegard på Myking
Delar av Myking kyrkjegard er ei mellomalderkyrkjegard som er automatisk freda. Denne må markerast som omsynssone i arealplankartet.
Verdifullt kulturlandskap
Kultur- og ressursutvalet ber om at følgjande tekst vert tatt med i føresegna til arealplanen:
- Område med natur- og kulturverdiar som vert vurdert som verdifulle
kulturlandskap, skal ivaretakast og forvaltast slik at kvalitetane i landskapet vert styrka.
- Kulturminne og kulturmiljø skal være ein integrert del av all planlegging og søknad om tiltak. I all arealplanlegging skal kulturmiljøet dokumenterast og det skal visast til korleis ein har søkt å ta omsyn til dette gjennom planforslag og plantiltak.
- Verneverdige enkelt bygningar og kulturmiljø, og andre kulturminne (som til dømes sjøbruksmiljø) skal i størst mogleg grad takast vare på som bruksressursar og settast i stand.
- Ved utbygging/fortetting og ved utbygging i LNF med spreidd busetnad skal det takast omsyn til bevaring av eksisterande bygningar, anna kulturmiljø og landskap.
Havbruk
Innan havbruk peikar utvalet på at Lindås kommune ikkje har rullert sjødelen av planen slik at denne vert tilpassa havbruksnæringa sine noverande eller framtidige behov. Kommunen må snarast råd revidere sjødelen av planen, i dialog med næringa, offentlege etatar og i lag med nabokommunar som grensar til dei same fjordsystema. Kultur- og ressursutvalet fremjar motsegn til akvakulturdelen av sjødelen av planen.
Samferdsel
Innan samferdsel vil utvalet rå til at det i kommuneplanen ikkje vert lagt opp til føresegner og retningslinjer for byggegrenser til fylkesvegar som er i strid med veglova. Utvalet saknar ei oversikt og ein strategi for utvikling av eit gang- og sykkelsystem for Lindås kommune som sikrar at til dømes sykkel kan nyttast som eit godt alternativ til bil på kortare avstandar innanfor kommunen.
Mjuke trafikantar
Utvalet vil tilrå at det i føresegnene vert sett krav om utbygging av
naudsynt infrastruktur som opprusting og trafikksikring av vegar med tilbod til mjuke trafikantar fram til skule og andre møteplassar. I område der det er tillate med spreidd utbygging må trafikksikker tilkomst sikrast før det vert gjeve løyve til ny utbygging.
Heile pressemeldinga med vedtak frå møtet i kultur- og ressursutvalet tysdag 8. mars 2011 (pdf)