Hordaland fylkesutval har vedteke at snøggbåtrutene i fylket i hovudsak skal vidareførast med dagens opplegg. Utlysing av 2. generasjons båtkontraktar skal også omfatta snøggbåt mellom Nordhordland og Bergen.
Fylkesutvalet sitt vedtak i saka «Hovudprinsipp for andre generasjons anbodskontraktar snøggbåt» i møte 26. januar 2012:
«1. Fylkesutvalet legg til grunn følgjande hovudprinsipp for andre generasjons snøggbåtkontraktar:
- Oppdeling i 5 kontraktar/rutepakkar; (1) Sunnhordland og Austevoll (2) lokalrute Espevær og Hernar, (3) Kvinnherad/Turistrute Hardanger/Rekstern-Våge-Os og (4) Kleppestø-Nøstet, (5) Nordhordland-Bergen.
- Alle sambanda skal vurderast som miljøprosjekt
- I hovudsak vidareføring av dagens ruteopplegg
- Universelt utforma fartøy
- Kontraktperiodar på 10+2+2 år
Nettokontraktar som avtaleform med unntak av rutepakke (4) og (5).
2. Konkurransegrunnlaga skal leggjast fram for samferdselsutvalet og fylkesutvalet før dei vert sendt ut.
3. I høve eksisterande rute Nordhordland-Bergen ber fylkesutvalet om at fylkesrådmannen går i dialog med eksisterande konsesjonshavar med mål om å vidareføra drift av ruta fram til oppstart for andre generasjons snøggbåtkontraktar 1.1.2014. Evt. meirkostnader for Hordaland fylkeskommune må dekkjast frå auka løyving til ruteproduksjon i budsjettvedtaket for 2012. Fylkesutvalet føreset at evt. tiltak er innanfor gjeldande regelverk for offentlege anskaffelsar. Dersom dette ikkje let seg gjera, ber fylkesutvalet om at fylkesrådmannen forserer anbodsprosessen for denne rutepakka.
4. Båttilbodet er ein del av det samanhengande kollektivtilbodet og fylkesutvalet ber om å få fram ei sak med oversyn over Skyss sitt tilbod opp mot dagens båttilbod i Hordaland, samt tilrettelegging for innfartsparkering/sykkelparkering i høve båttransport.»
Pkt. 3 i vedtaket vart føreslege av Terje Søviknes på vegner av Frp/H/V. Forslaget vart samrøystes vedteke. Eit mindretal på sju (Ap, Sv, Sp, KrF) røysta primært for følgjande forslag frå Kristeleg folkeparti, sett fram av Torill S. Nyborg:
«A. Strekninga Bergen-Nordhordland vert anbodsutsett og båtruta vert tilrettelagt for kortsamkøyring og korrespondanse med buss.
B. I påvente av oppstart av den nye anbodsutsette ruta, vert fylkesrådmannen beden om å gå i forhandlinger med BNR om drifta i denne perioden. Det er ein heilt klar føresetnad for fylkesutvalet at båtruta skal oppretthaldast til ordinær anbodsdrift vert starta opp.»
Etter at KrF sitt forslag fall, røysta mindretalet subsidiært for fellesforslaget frå Frp/H/V.
Pkt. 4 i vedtaket vart samrøystes vedteke etter forslag frå Arbeidarpartiet ved Ruth Grung.
Stanley Hauge 26.01.2012 15:54