Vyrde fylkesting!
Vel møtt til marsting i Bergen.
I dagane 22.-24. februar var Stortinget sin transport- og kommunikasjonskomité på synfaring i Hordaland. Dei fekk ein skikkeleg vintertur rundt om i fylket vårt.
Overfor stortingskomiteen påpeika eg at vidare utbygging av E39 Kyststamvegen må ha høgaste prioritet. Nærast føreståande er å koma i gang med utbygging av strekninga Svegatjørn-Rådal med nytt kryss i Rådal. Dette prosjektet er svært viktig for utvikling av E39 langs heile vestlandskysten – det vil gje ein stor tidsgevinst og langt betre regularitet og framkomst. Det vil også gje betre tilkomst til Flesland flyplass og næringsområda utover mot flyplassen.
For den vidare utbygginga av bybana i Bergen, understreka eg overfor komiteen at det er nødvendig å få vedtak om bompengesøknaden i vårsesjonen i år. Og for byggjetrinn 3 Rådal-Flesland og seinare utbygging til andre bydelar, er statleg medfinansiering heilt avgjerande. Derfor er dette lagt inn som ein viktig føresetnad i søknaden om belønningsmidlar, der eg bad statsråd Meltveit Kleppa – då ho vitja Bergen for nokre veker sidan – om at Hordaland fylkeskommune må få koma i forhandlingsposisjon i høve belønningsmidlane.
Eg understreka overfor Samferdselskomiteen at det er stort behov for jernbanesatsing også på Vestlandet. Tida for modernisering av Bergensbana er overmoden. Utbygging og utbetring av jernbanelinja og nytt materiell som kan få reisetida ned i 4,5 timar mellom Bergen og Oslo, må prioriterast.
Regjeringa har varsla og lova ein kraftig auke i løyvingane til samferdsel i den komande tiårsperioden. Eitt av regjeringa sine mest konkrete og ambisiøse valløfte var 100 milliardar kroner meir til samferdsel. NHO hevdar no at alt første året i den nye planperioden ligg regjeringa eit par milliardar kroner under løfta i Nasjonal transportplan.
Frå vår ståstad her i Hordaland er det heilt opplagt at det trengst ein kraftig auke i løyvingane til samferdsel, slik det er lagt til grunn i NTP. Eg reknar med at regjeringa vil stå ved den satsinga det er lagt opp til, også når dei til helga har startkonferansen om statsbudsjettet for 2011.
Folketalsutvikling
Vi er i den heldige situasjon at for tredje året på rad hadde Hordaland rekordauke i folketalet i 2009. Fylket vårt fekk 7 494 fleire innbyggjarar og folketalet ved årsskiftet vart 477 175. Veksten var på 1,6 %.
4153 personar kom frå utlandet, 600 kom flyttande frå andre fylke, og fødselsoverskotet var på 2 724.
I 24 av kommunane i fylket auka folketalet, medan det gjekk ned i åtte. Austrheim hadde den sterkaste folkeveksten med 6,3 % (162 nye innbyggjarar). Går vi til Hardanger så er det gledeleg å sjå at folketalet har auka med 104 personar takka vere tilflytting frå utlandet.
Bergen fekk over 62 % av folkeveksten i 2009. Byen veks såleis sterkare enn fylket samla.
Det skjer mykje bra i skulesektoren!
Moderniseringa av skulebygningane til fylkeskommunen skjer for tida med stort tempo. Byggjeaktiviteten er stor. Og vi står framfor ein hyggeleg haust med mange opningar av nybygg og store tilbygg.
Den nye Nordahl Grieg videregående skole i Bergen er det største nybygget. Skulen på Sørås startar til hausten med elevar på Vg1-trinnet. Med elevar på alle årstrinn hausten 2012 vil skulen ha over 850 elevar.
Nybygget for Osterøy vidaregåande skule i Lonevåg skal også takast i bruk til hausten. Skulen som i dag har om lag 130 elevar vil få ei standardheving som eg er sikker på vil verta til stor glede for både elevar og personale. I nybygget vil det vera plass til over 200 elevar.
Store tilbygg som er under oppføring ved Austevoll, Kvinnherad og Stord vidaregåande skular, skal også stå ferdige og takast i bruk til hausten.
Framdrifta for alle desse nemnde nybygga er i rute. For Hordaland fylkeskommune er den samla investeringa i desse utbyggingane på over 820 millionar kroner.
Så til U-864
Rett før helga kom meldinga om at regjeringa utset hevinga av ubåtvraket ved Fedje. Det krevst ytterlegare utgreiingar, meiner regjeringa.
Fiskeri- og kystministeren seier at regjeringa ikkje har endra standpunkt. Etter at den eksterne kvalitetssikringa av hevinga av U-864 har påpeika uvisse på fleire område, vil regjeringa ha nye utgreiingar. Vi har ikkje råd til å utsetja miljøet for risikoen ved ein mislukka hevingsoperasjon, seier ministeren.
No vil regjeringa også utgreia tildekkingsalternativet grundigare.
«For å sikre at vi etter den nye utredningen har et forsvarlig alternativ velger regjeringen å inkludere tildekkingsalternativet, i tillegg til et alternativ som eventuelt kombinerer heving og tildekking i dette arbeidet.»
heiter det i pressemeldinga frå regjeringa.
Eg har merka meg at tre departementet vert trekte inn i arbeidet. I tillegg til Fiskeri- og kystdepartementet og Miljøverndepartementet, skal også Finansdepartementet delta.
Eg er samd i at kvikksølvlasta ved Fedje må fjernast så sikkert og forsvarleg som mogleg. No kan det tidlegast skje i 2012.
Eg skjønar også svært godt at fedjesamfunnet er utolmodig og skuffa over utsetjinga. Regjeringa må ikkje la denne saka no gå inn i eit langt kvileskjer. Vi skal i alle fall vera på hogget og pressa på om det vil visa seg å verta nødvendig.
I denne tingseta står temabolkar om «forvaltningsreforma» og «fylkeskommunalt eigarskap» på dagsorden. Det er viktig for oss som folkevalde å ha kunnskap om kva reforma i praksis betyr, og korleis vi riggar til administrasjonen for å meistra dei nye oppgåvene.
Det er også veldig nødvendig for alle oss som er medlem i styre, representantskap og generalforsamlingar på vegner av fylkeskommunen, å ha ei medviten haldning til eigarskapet vårt, slik at vi er i stand til å ta kvalifiserte avgjerder i dei verva vi har. Eg håpar dette vert to spennande og nyttige sekvensar for oss alle.
Vel møtt til fylkesting! Fylkesrådmannen har ordet.