Fylkestinget står fast på sitt tidlegare vedtak (sak 12/05) om å realisera prosjektet, og ber om at bompengeproposisjonen for Jondalstunnelen vert lagt fram, og prosjektet vert lyst ut på anbod så snart som råd for å sikra byggjestart i 2009 – i tråd med finansieringsplanen..
Finansieringsopplegget som er vedteke, inneber at fylkeskommunen skal låna 532 mill. kr til å finansiera tunnelen.
Vedtak:
«1) Fylkestinget viser til nytt kostnadsoverslag for Jondalstunnelen som inneber ein kostnadsauke på 279 mill kr, og tek dette til etterretning.
2) Fylkestinget står fast på sitt tidlegare vedtak (sak 12/05) om å realisera prosjektet, og ber om at bompengeproposisjonen for Jondalstunnelen vert lagt fram, og prosjektet vert lyst ut på anbod så snart som råd for å sikra byggjestart i 2009 – i tråd med finansieringsplanen.
3) Fylkestinget slår fast at den vedtekne finansieringsplanen for Jondalstunnelen, med råme på 529,4 mill kr, ligg inne i økonomiplanen som gjeld fram til 2011. Fram til 2011 vil det, ut frå den vedtekne finansieringsplanen, vera nok midlar frå eksterne kjelder til å dekke byggjekostnadane. Fylkesutvalet vil leggja til grunn at auka kapitalkostnad som følgje av kostnadsauke vert finansiert med framtidig konsesjonskraftinntekt, som i stor grad er utan bindingar frå 2010.
4) Fylkestinget godkjenner slik ny finansieringsplan for Jondalstunnelen, i løpande kroner:
Statstilskot 50,0 mill. kr
Kompensasjonsmidlar 80,6 mill. kr
Kommunale tilskot 58,1 mill. kr
Bompengar 86,9 mill. kr
Lånemidlar 532,0 mill. kr
Sum 807,6 mill. kr»
Mindretalet i fylkestinget (11 H, 3 KrF) gjekk inn for følgjande forslag:
1) Fylkesutvalet viser til nytt kostnadsoverslag for Jondalstunnelen som inneber ein kostnadsauke på 279 mill kr, og tek dette til etterretning.
2) Fylkesutvalet viser til regionreforma som er venta gjennomført frå 2010 der m.a. riksvegar – utanom stamvegar – saman med fylkesvegar vert klassifiserte som regionvegar.
3) Fylkesutvalet vil koma attende til finansiering av Jondalstunnelen i samband med handlingsprogrammet for regionvegane i Hordaland i fylkesbudsjettet for 2010 – og ber om at tidlegare vedtekne økonomiske råmer blir ståande i økonomiplanen.
Protokollmerknad frå Kristeleg folkeparti og Raudt:
«KrF meiner at alternativet med lang tunnel – S7 – er best både i høve til miljø og trafikktryggleik. Subsidiært må alt. S5 (tunnel mellom Nordrepollen og Austrepollen) vurderast i staden for S1.»
Protokollmerknad frå Ap, Sp, V, SV, Frp, KrF, Raudt:
«Det vert lagt til grunn for vedtaket om auka bruk av konsesjonskraftmidlar til Jondalstunnelen at også Nordhordland i åra som kjem skal verta tilgodesett med konsesjonskraftmidlar basert på ei vurdering av kvar dei aktuelle konsesjonskraftinntektene er genererte.»
Protokollmerknad frå Raudt og Kristeleg folkeparti:
«I anbodsrunden må det leggjast stor vekt på både kostnadssida og miljøomsyn, samt auka statstilskot for å få fullfinansiert og gjennomført Jondalstunnelen så snart som råd. I tillegg føreset vi at i neste etappe blir strekninga Austrepollen-Nordrepollen rassikra med tunnel-løysing.»