- Avkortinga skuldast etter Høykom si meining at vi i for liten grad har lagt inn ein eigendel frå leverandøren av breibandstenester. Høykom meiner vi bør kunne oppfylle planen om full breibandsdekning i heile fylket slik det ligg i søknaden, opplyser stabsleiar Matti Torgersen i Hordaland fylkeskommune.
Kommunane må ta resten
Hordaland fylkeskommune søkte om 11.844.000 kroner i støtte frå Høykom for å kunne gje om lag 400 husstandar og ei rekkje bedrifter i 145 område i fylket breibanddekning. - Med desse midla kan vi få full breibandsdekning i Hordaland i løpet av neste år, uttala fylkesordførar Torill Selsvold Nyborg sist månad.
Full breibandsutbygging i heile Hordaland fylke er kostnadsrekna til om lag 47,4 millionar kroner. Fylkeskommunen fekk i mai i år 8,13 millionar kroner frå Kommunal- og regionaldepartementet til utbygging av breiband i område utan slik tilknyting i dag. Resten må finansierast av kommunane sjølve. Dei største prosjekta gjeld for kommunane Bømlo, Austevoll, Osterøy, Tysnes, Lindås, Fusa og Odda.
- Hordaland har 33 kommunar. 7 kommunar har full breibanddekning, ein kommune tek ikkje del i prosjektet og 25 kommunar ønskjer breibandutbygging med kommunal medverknad. Prosjektplanen for Høykom-midlar omfattar 23 kommunar der planane er utvikla i tråd med føresetnadene i Høykom-utlysinga, og der lokal forankring er gjennomført både i fylkeskommunalt planarbeid og prioriteringar i kommunane, opplyser Torgersen.
255 millionar
Om lag 46.000 nye husstandar vil på landsbasis no få tilgang til breibandstenester. Når prosjekta er realisert vil over 99 prosent av befolkninga ha tilgang til breiband. Regjeringa løyvde 255 millionar kroner i revidert nasjonalbudsjett i år øyremerka breibandsutbygging. 155 millionar vart fordelt til fylkeskommunane. Høykom mottok i alt 23 søknadar frå 16 fylker. Søknadane dekker 273 kommunar med samla innbyggartal på 2,6 millionar.