Fire selskap la inn anbod på bussrutene i Austevoll innan tilbodsfristen gjekk ut. Krava om årsgodtgjering ligg mellom 11,9 og 19,2 millionar kroner.
Tide Buss AS Atlantic Auto AS, Os Minibusservice AS og Veolia Transport Norway har lagt inn anbod på kontrakten som gjeld kollektivtrafikk med buss i Austevoll frå 1. januar 2008 til 31. desember 2012. Rutepakke Austevoll utgjer til saman om lag 358.000 rutekilometer per år.
Samferdselsavdelinga i Hordaland fylkeskommune har fått inn fire anbod på drift av bussrutene i Austevoll. Årsgodtgjeringa tilbydarane krev varierer mellom 11.900.000 og 19.253.181 kroner.
Kvalitetsheving
I det nye anbodet har fylkeskommunen lagt opp til ei kvalitetsheving i høve til miljø og strengare krav til universell utforming av bussmateriellet.
- Prisen betyr mest når vi skal velge operatør, men vi vil også vurdere tilbydarane i høve til kvalitetssikringsystem, miljøtilhøve og leveringspresisjon. Det vert lagt opp til at val av operatør vil skje i løpet av april og med kontraktsinngåing i mai.
Sunnhordland
Den 28. februar i år vart Rutepakke 1.2 Sunnhordland lyst ut på anbod. Denne rutepakken er på 2.050.000 rutekilometer og omfattar kommuane Fitjar, Stord, Bømlo og Sveio. Denne kontrakten gjeld frå 01. mai 2008 og fram til 31.desember 2014.