Fylkesutvalet rår sterkt frå at nordre og midtre alternativ frå Radøy til Mongstad, med kombinasjonar av sjøkabel og luftline, vert valt. Konfliktnivået for desse alternativa er omfattande, meiner fylkesutvalet.
Fylkesutvalet fremjar motsegn til NVE sitt traseval grunna dei store konfliktane på Rapeneset og Fosenstraumen.
Høyring
Det er Olje- og energidirektoratet (OED) som har sendt Norges vassdrags- og energidirektorat (NVE) si innstilling på høyring, og som fylkesutvalet har vedteke fråsegn om.
Tilrådd løysing frå NVE er den mest konfliktfylte av alternativa, og med lengst luftlinetrase. Regionen ønskjer primært kabel heile vegen.
Motsegn
I fråsegna trekkjer fylkesutvalet fram at traseen NVE rår til går over Rapeneset og Fosenstraumen der det er påvist rundt 76 automatisk freda kulturminne, i hovudsak steinalderbuplassar som utgjer eit heilskapeleg kulturmiljø av nasjonal verdi. Funna har stor tidsdybde og høg opplevings- og formidlingsverdi. Store delar av Rapeneset er spesialområde, bandlagd etter Kulturminnelova, i eksisterande kommuneplan for Radøy. Kraftlinja er i direkte konflikt med fleire av dei automatisk freda kulturminna, med det bandlagde området, samt det heilskapelege kulturmiljøet i Fosenstraumen. Fylkesutvalet fremjar motsegn på innstilling til trasé grunna dei store konfliktane på Rapeneset og Fosenstraumen.
Troll A
Fylkesutvalet vedtok 19. mai også fråsegn om kraftforsyninga til Troll A-plattforma. NVE har rådd til at kraftforsyninga til Troll skal skje med Kollsnes som tilkoplingspunkt. Den nye lina mellom Mongstad og Kollsnes skal syta for straumen som trengst.
Åtvarer
Fylkesutvalet i Hordaland åtvarer mot eit val av kraftforsyning til Troll A som tvingar fram konfliktfylte løysingar for lina Mongstad-Kollsnes grunna tidspress.
Sjå i samanheng
Søknaden til Statoil syner vilje til bruk av lengre sjøkabel med tilhøyrande meirkostnader for å få på plass ei trygg forsyning av Troll A uavhengig av andre kraftlineprosjekt, påpeikar fylkesutvalet. Hordaland fylkesutval meiner dette viser at kraftforsyning til Troll A og finansiering av konfliktreduserande tiltak med auka kabling på 300(420)kV lina Kollsnes-Mongstad er relevant å sjå i samanheng.
Pressemelding med vedtak og innstillingar i fylkesutvalet 19. mai 2011 (pdf-fil)