Fiskeri- og kystminister Lisbeth Berg-Hansen vil utvikle Noreg til den fremste sjømatnasjonen i verda og skal lage melding til Stortinget om fiskeri- og havbrukspolitikken, her med fylkesordførar Torill Selsvold Nyborg. (foto: Bjarte Brask Eriksen)
Teknologisk miljø
– Eg vil prioritere forskinga. Vi må utvikle den vidare. Vi har kaldt og klart farvatn, råstoff og teknologisk miljø. Det er avgjerande for den vidare utviklinga, seier statsråden.
Lakselus
Eitt av tiltaka innan forsking er å løyse problemet med lakselus.
– Lus er den største utfordringa innan oppdrett. Det uroar meg at luseplaga aukar. I år er det meir lus på sjøaure- og villakssmolt enn i fjor. Vi må få dette under kontroll og setje inn tiltak. Regjeringa doblar innsatsen på forsking på lakselus og løyver 66 millionar kroner. Vi vil og betre regelverket med kontroll av lakselus, men oppdrettarane må og sjølve ta ansvar og gjennomføre tiltak. Vi kjem til å sjå resultat av desse tiltaka, seier statsråd Lisbeth Berg-Hansen.
Skal bli fremst i verda
Statsråden har som mål å utvikle Noreg til den fremste sjømatnasjonen i verda.
– I fjor eksporterte vi sjømat for 54 milliardar kroner. Berre Kina er større. For å nå målet skal regjeringa leggje fram ei ny melding til Stortinget med brei og heilskapleg gjennomgang av fiskeri- og havbrukspolitikken. Det er åtte år sidan førre melding om sjømat. Mykje har skjedd sidan den gongen. Den globale handelen med sjømat er i kontinuerleg endring. Vi ser auka etterspurnad etter sunn og god sjømat frå Noreg.
Har ikkje tent pengar på 15 år
Men statsråden er ikkje nøgd med alt.
– Delar av næringen slit. Dei som driv oppdrett av kvitfisk har ikkje tent pengar dei siste 15 åra. Torsk blir teke i land i store mengder tidleg på året, men ikkje resten av året. Vi treng meir kunnskap og kompetanse, særleg i høve nye næringar basert på marin bioprospektering (verdifulle, biologisk aktive komponentar frå organismar i havet) og auka bruk av marin bioteknologi, sa fiskeri- og kystminister Lisbeth Berg-Hansen då ho møtte Vestlandsrådet i Bergen 14. juni.
Fylkesordførar Torill Selsvold Nyborg møtte fiskeri- og kystminister Lisbeth Berg-Hansen i Vestlandsrådet 14. juni.