Framfor "smykket" i tilbygget. Fv. rektor Leif-Helge Engelsen, avdelingsleiar Anne Karin Sele Moe, utvalsleia Roald Stenseide, fylkesordførar Torill Selsvolv Nyborg og opplæringsdirektør Svein-Erik Fjeld.
Funksjonaliteten, arealet og den hurtige planleggings- og byggeperioden. Rektor Leif-Helge Engelsen var full av lovord då han fredag 3. september kunne helsa fylkesordførar Torill Selsvold Nyborg, utvalsleiar Roald Stenseide og opplæringsdirektør Svein-Erik Fjeld velkomen til opningsseremoni.
Teken på alvor
Rektor og eigedomssjef Helge Haavardtun i Hordaland fylkeskommune var samde om at dette har vore ei spesiell og særleg vellukka byggesak. Heile prosessen har gått på skinner, bokstaveleg talt: Markeringa av at det 1.225 kvadratmeter store bygget er klar til å takast i bruk fann stad knappe to år etter at rektor sendte ei bekymringsmelding til Hordaland fylkeskommune om dei tungvinte og uverdige tilhøva for dei til dels sterkt pleietrengjande elevane ved avdeling for meistring og utvikling.
- Arve, Linda, avdelingsleiar Anne Karin Sele Moe og Silje er glade for å kunna testa ut den nye storstova i 3. etasjen i nybygget.
- Hordaland fylkeskommune tok bekymringsmeldinga vår på alvor. Skulen la alt anna til side for ikkje å seinka prosessen, seier rektor Engelsen.
Resultatet er at heile planleggingsprosessen har teke halvanna år. Sjølve byggestarten tok til i fjor haust. Tempoet likevel ikkje ført til nokon reduksjon i omsynet til brukarkrav og kvalitet, forsikra Haavardstun.
Meistring og utvikling
Tilbygget er først og framst innreia med tanke på elevar som treng særskilt tilrettelegging av undervisninga. Første og tredje etasjen er innreia med tanke på behova til avdeling for meistring og utvikling. Samtlege elevar med behov for særskilt tilrettelagt opplæring i kommunen er no samla ved skulen. Dei 18 til dels sterkt pleietrengjande elevane kan no tilbringa heile skuledagen i ro på ein stad, og som ein integrert del av fellesskapen på Saghaugen. Målet er at dei skal oppleva skulen som ein god stad å vera. I eit spesialtilpassa bygg vil denne elevgruppa lettare kunna oppleva at dei meistrar kvardagen, slik at dei kjenner tryggleik i samvær med andre menneskjer.
- Ei enorm forbetring av tilhøva for meistring og utvikling. Dette fortenar de, helsa fylkesordførar Torill Selsvold Nyborg. Fylkesordføraren understreka samstundes at dette er ein av tre store fylkeskommunale skulesatsingar i Sunnhordlandsregionen denne hausten.
Rektor Leif-Helge Engelsen og opplæringsdirektør Svein-Erik Fjeld testar dei nye biologi- og kjemilaboratoria.
I andre etasjen har elevar på studieførebuande fått nye kjemi- og biologilaboratorier. Varaordførar Leif Steinar Alfsvåg i Stord kommune, som sjølv gjekk ut av dåværande Stord Gymnas i 1978, høyrtes nærast som han var misunneleg på dagens elevar og dei moderne fasilitetane dei kan nyta godt av.
- Skulen er sjølve livet
- Skulen er ikkje berre ei førebuing til livet. For elevane som går her, er skulen sjølve livet. Då er det viktig å ha ein skule som er bygd med tanke på det beste for kvar einskild elev, helsa opplæringsdirektør Svein-Erik Fjeld.
Utvalsleiar Stenseide såg tilbygget som enno eit steg på vegen i retning av å tilby samlege elevar i vidaregåande skular i Hordaland gode skuletilbod i nærleiken av der dei bur.
Takka reingjeringspersonalet
Å gjennomføra ein såpass omfattande byggjeprosess med over 600 elevar vrimlande rundt på byggjeplassen, var ei utfordring, kunne Harald Engevik representanten for totalentrepenør Engevik og Tislevoll AS fortelja. Han retta ei stor takk til reingjeringspersonalet, som hadde mykje av æra for at det gjekk så bra å kombinera undervisning og byggjeaktivitet.
Etter at tilbygget no er teke i bruk er noko over 600 av dei vel 950 elevane ved skulen samla på Saghaugen. Elevane på yrkesfag er framleis spreidd på fire ulike lokasjonar.