Kvam herad sitt framlegg til kommunedelplan for Kvamskogen har vore ute til andre gongs høyring. Kultur- og ressursutvalet i Hordaland fylkeskommune meiner framlegget er forbetra på fleire punkt og at konsekvensutgreiinga no er dekkjande.
Omfattande utbygging
Framlegget legg opp til ei omfattande bygging av nye hytter og infrastruktur på Kvamskogen. Kultur- og ressursutvalet har ingen synspunkt på kor mange nye hytter som kan byggjast før området sine natur- og friluftskvalitetar vert svekka.
Utvalet føreset at alle freda kulturminne innanfor planområdet framstår som bandlagt areal i den endelege planen. Utvalet set også foten ned for utbygging i det urørte naturområdet Røyrlidtjørnane.
Alpinsatsing
Kvamskogen er svært viktig som regionalt område for friluftsliv og fritidsbusetnad. For å behalda og vidareutvikla området må alpint vera ein del av tilbodet. Utvalet har merka seg Kvam herad sitt arbeid med å finna nye snøsikre område for alpinanlegg, og imøteser framtidig planframlegg som kan sikra slike anlegg.
Byggjeområda for alpinlandsby/hytter har stor verknader for landskap og friluftsliv. Ei konsekvensutreiing med påfølgjande reguleringsplan vil visa om dei avsette områda faktisk er eigna til føremålet.
Romslege løyper
Kulturutvalet er oppteken av å sikra trygge og romslege skiløyper ved viktige knutepunkt, oppmarsj-, og nedfartsområde. Utbygging i sentrale område må ikkje medføre flaskehalsar for ferdselen.
Skiløypa gjennom senterområdet i Furedalen bør utvidast med større buffer. Senterområdet bør reduserast tilsvarande, tilrår utvalet. Når skiløypa i nord vert utvida, vil det også verta rom for eit område med leiligheter i tilknyting til senterområdet.
Vinterbrøytte vegar
Vinterbrøytte vegar kan skape konflikt i høve til skiutfart. Planforslaget gir viktige avklaringar for kva eksisterande vegar som ikkje skal brøytast. Retningslinene for framtidig praksis er likevel uklåre. Kultur- og ressursutvalet ber Kvam herad tydeleggjera kva strategi herader ønskjer når det gjeld vinterbrøytte vegar i området.