Lærar Ewa Bivand er stolt av elevane sine som har engasjert seg i klimakampen: Amalie Eriksen (f.v.), Ingeborg Wiker, Ingrid Børve, Kristian Fluge Sævig, Tonje Liseth, Torjus Steffensen, Skage Øvredal og Kim Myrmehl Teigland. (foto: Bjarte Brask Eriksen)
Samarbeid med Italia, Frankrike, Portugal og Polen
I byrjinga av oktober var 15 elevar og ni lærarar frå Italia, Frankrike, Portugal og Polen i Bergen for å samarbeide med klasse 2A ved Bergen handelsgymnasium om prosjektet "FOCUS: Footprints of CO2 in Schools". Lærar Ewa Bivand fortel at elevane mellom anna har sett på klimautslepp frå produksjon og bruk av PC i motsetnad til bøker, og utslepp frå fly og andre typar transport.
Bøker meir miljøvennlege enn PC-en
– Granskingane våre viser at det er mykje meir utslepp frå produksjon og bruk av PC enn bøker. Vi har sett på den totale bruken av PC ved skulen og på kor mykje papir vi brukte før PC-en vart teken i bruk. Vi hadde ein hypotese om at PC var miljøvennlig og at vi ikkje prenta så mykje ut, men resultatet av granskingane våre vart det motsette. Granskingane viser at å produsere bøker er mindre miljøskadeleg enn å produsere PC-ar. Ein PC har gjerne ei levetid på berre tre år før den blir skifta ut. Eigentleg burde vi berre brukt bøker. Mange av oss kunne nok greie seg utan PC, men mobiltelefonen er det verre med, seier lærar Ewa Bivand.
Elevane får orientering om kva Lyngheisenteret har å seie for miljøet. (privat foto)
Drøfta klima med ordførar Gunnar Bakke
I tillegg til at elevane har arbeidd med klimareduserande prosjekt, har dei drøfta klima med ordførar Gunnar Bakke i Bergen og fått foredrag ved Bjerknessenteret. Sosiale poster på programmet har vore felles feiring av den europeiske språkdagen med mat frå fleire land og felles song av ”Fader Jakob” på fleire språk, samt turar til Lyngheisenteret, Fløyen og skøyter i Bergenshallen. Dei utanlandske elevane budde hos vertsfamiliar frå Bergen handelsgymnasium.
Kvar skule skal redusere utsleppa av C02
Prosjektet held fram med møte i Algarve, Portugal, i mars neste år og skal avsluttast i Opole, Polen i mai.
– Målet vårt er å sjå på arbeidet kvar av skulene gjer for å redusere utsleppa av CO2, seier lærar Ewa Bivand.
I Bergen drøfta elevane klima med ordførar Gunnar Bakke og hadde ein fin tur til Fløyen. (privat foto)