Under føresetnad av at Stord kommune, som er majoritetseigar, gjev nytt lån til Sunnhordland Lufthavn AS, vil Hordaland fylkeskommune medverka med inntil 2,52 mill. kr (21 %) av lånet, vedtok Hordaland fylkesting 13. oktober.
Lufthavn AS har søkt eigarane, Stord kommune (79 %) og Hordaland fylkeskommune (21 %), om 12 mill. kr i lån til finansiering av sikringstiltak ved Stord Lufthamn. Selskapet har fått avslag frå fleire bankar om lån til sikringstiltaka og er no i likviditetskrise sidan ein ikkje har fått lånefinansiert investeringane.
Generalforsamling
I vedtaket seier fylkestinget:
«Hordaland fylkeskommune føreset at det vert kalla inn til ekstraordinær generalforsamling med agenda val. Representantar for eigarane, Hordaland fylkeskommune og Stord kommune, skal fram til ekstraordinær generalforsamling evaluere styret i Sunnhordland Lufthamn AS sitt arbeid og fungere som valkomité.
Fylkesordføraren ivaretek fylkeskommunen sine interesser i denne prosessen.»
Vedtaket i fylkestinget var samrøystes.
Statsmidlar
Stord Lufthamn ligg i perioden 2010-19 inne i Nasjonal transportplan med årlege løyvingar på 12 mill. kr. Lufthamnselskapet mottek også årleg tilskot til lufttrafikktenesta, for 2010 er dette budsjettert med ca. 4,6 mill. kr.
Protokollmerknad
frå Sosialistisk venstreparti: «SV meiner det no er trong for ei sak med vurdering av fylkeskommunen sitt engasjement i Sunnhordland Lufthavn AS.»