I fylkesutvalet 29. september var det skepsis og motstand mot å oppretta fylkesråd.
Forslag
Forslag frå Ap, SV, SP (sett fram av Gisle Handeland):
«Fylkesutvalet finn ikkje grunn til å gå vidare med vurderinga av parlamentarisme som styringsform.»
Forslaget fekk 7 røyster (Ap, SV, SP og V).
Forslag frå Kristeleg folkeparti og Høgre (sett fram av Pål Kårbø):
«Det vert innført parlamentarisme som styringsform i Hordaland fylkeskommune frå valperioden 2011-15. Endeleg avgjerd vert teken i det nye fylkestinget.»
Forslaget fekk 5 røyster (KrF, H).
Fremskrittspartiet røysta imot begge forslaga.
Til vurdering
Petter Kvinge Tvedt (Frp) sa at Fremskrittspartiet ikkje har konkludert, men vil drøfta spørsmålet om parlamentarisme i programarbeidet framover. Parlamentarisme er ikkje nødvendigvis eit godt alternativ i fylkeskommunen, sjølv om det fungerer godt i Bergen, sa han.
Pål Kårbø (KrF) sa at Kristeleg folkeparti ikkje har teke endeleg avgjerd om partiet vil gå for parlamentarisme, men i denne omgang røysta dei for det. Spørsmålet vil i alle fall først verta endeleg avklart når det nye fylkestinget skal behandla saka, sa han.
Harald Hove (V) sa at Venstre tek opp spørsmålet i programprosessen framover, men han for sin del var skeptisk til eit fylkesråd.
To omgangar
For at det skal kunna innførast parlamentarisme i fylkeskommunen, må fylkestinget handsama saka to gonger. Ein gong i det nest siste året (2010) i denne fylkestingsperioden, og så ein gong til tidleg i neste periode. Dersom parlamentarisme vert vedteke, må ordninga vera sett i verk innan 31.12.2012.
Utfallet av handsaminga no i oktober har ingen ting å seia for vedtaket som det nye fylkestinget skal gjera etter valet, det er nødvendig og tilstrekkeleg at saka er handsama og votert over i år.
Lenkjer
Ugreiing om parlamentarisme i Hordaland fylkeskommune (pdf-fil)
Fylkestinget 12.-13. oktober 2010 - Program og sakliste