Gustav Bahus, leiar av samferdselsutvalet i Hordaland, fyrte av siste salva på den 1550 meter lange tunnelen Haugadalen og Kårvika på Osterøy måndag 8. november. Neste haust opnar den 3,3 kilometer lange vegen mellom Hauge og Lonevåg.
Framhald
Den nye vegen er eit framhald av det omfattande arbeidet med å gje Osterøy betre vegsamband og som starta med Osterøybrua (1997), Tiråstunnelen (1998) og Hannisdal (2002). Med ny veg mellom Hauge og Lonevåg vil det i hovudsak bli god veg frå E16 og heilt fram til kommune-senteret i Lonevåg.
Leiar av samferdselsutvalet i Hordaland, Gustav Bahus, fyrte av siste salva i den nye tunnelen på Osterøy.
223 millionar
Det nye vegprosjektet kjem til å koste 223 millionar kroner og er finansiert med 109 millionar frå staten, åtte millionar i kompensasjonsmidlar og 106 millionar kroner i bompengar.
90 meter lang bru
Arbeidet med vegen starta i fjor haust. På Hauge blir vegen knytt til ”Hannisdalslina” og i Lonevåg til den eksisterande vegen med ei rundkøyring ved ”Tide-tomta”. Over Lonevågen blir det bygd ei bru på om lag 90 meter lang. vegane frå Revheim og Hjellvik blir knytt til den nye vegen i eit felles kryss ved Hauge.
Gustav Bahus, leiar av samferdselsutvalet i Hordaland, gratulerer byggjeleiar Kari Bremnes og prosjektleiar Tor Arne Thorsen i Statens vegvesen med gjennomslaget i tunnelen.