Bybanen sett frå ein kulturell ståstad. (Foto: Ann Steindal/Hordaland fylkeskommune).
Hordaland og Bergen sin posisjon som kulturelt tyngdepunkt nummer to i norsk samanhang utfordrar fagfolka så vel som for politikarane i Kultur- og ressursutvalet i fylket. Betre samordning av ressursane – både dei menneskjelege og dei økonomiske – vil styrkja Hordaland og Vestlandet si rolle i norsk og internasjonal samanhang, er det semje om.
Kulturkraft
Idrettsanlegg, bibliotek og museum er viktige samlingspunkt i lokalsamfunna. Slik utgjer kulturen ei minst like viktig drivkraft for samfunnsutviklinga som vegar og skular. Likevel har kulturinstitusjonane si rolle som regionale utviklingsaktørar til no vore lite synleg. Fylkeskonferansen skal bidra til å tydeleggjera kulturen si rolle og leggja grunnlag for eit felles strategisk arbeid for kultur- og idrettssektoren.
Ulike statlege organisasjonar løyver i dag mykje pengar til kulturinstitusjonane i Hordaland og Bergen, utan at fylkeskommunen verken har oversikt eller kontroll over ressursbruken. Å få utarbeida ein slik oversikt vil vera første steg på vegen mot å demma opp for den statlege sentraliseringa og byråkratiseringa av kulturmidlane.
Verdiskaping
Kultur er eit viktig innslag i kvardagen til oss alle, frå frivillig sektor via utøvande kunstnarar og kulturinstitusjonar til næringslivet. Kulturpolitikken legg føringar for ein viktig del av verdiskapinga i fylket. Målet er at flest mogeleg utøvarar skal kunna bu og leva av kultur i fylket.
Vertskap for konferansen er Kultur- og ressursutvalet i Hordaland. Det inneber at dei politiske utfordringane på kultur- og idrettssektoren vil verta synleggjorte i langt sterkare grad enn dei faglege dei to dagane konferansen varer.
Program
Dag 1 vert det lagt opp til tre parallelle sesjonar, med tema: ”Idrett og friluftsliv: Reformar – rot, bot eller betring”, ”Museum: Nye trendar i musea – politikk for framtida” og ”Bibliotek: Nytt løft for biblioteka – strategiar for framtida”.
Dag 2 vil ha ei overordna strategisk tilnæring, med antyding om framtidige vegval.
Den strategiske tilnærminga fengjer. Før helga hadde meir enn 250 personar meld si interesse for å delta på fylkeskonferansen for kultur og idrett.
For meir informasjon, kontakt Helge Andre Njåstad, leiar for kultur- og ressursutvalet, tlf. 957 97 021.