Utbetringa av siste flaskehalsen på Fv. 48 gjennom Tysse sentrum i Samnanger bør framskundast. Samferdselutvalet i Hordaland har samrøystes tilrådd at Samnanger kommune får forskottera 100 millionar kroner slik at arbeidet kan starta snarast mogleg.
Omlegging av den smale fylkesvegen gjennom Tysse sentrum er eit lenge etterlengta tiltak hos så vel innbyggjarane så vel som for gjennomreisande trafikkantar. Ei omlegging av den 5,8 kilometer lange strekkja inneber mellom anna driving av 2,3 kilometer tunnel og bygging av gang- og sykkelsti.
Bak forskotteringssøknaden som i dag vart samrøystes tilrådd av samferdsleutvalet står Frank Mohn Fusa, Fusa Kraftlag, BKK, Fusa kommune, Samnanger kommune og Kvinnhead kommune.
Kostnader og framdrift
Prosjektet er prioritert i handlingsprogrammet for fylkesvegnettet i Hordaland for 2010 – 2013 (19) innanfor ei totalramme på 335 millionar 2008-kroner. Det er lagt opp til oppstart i 2012.
Dersom fylkestinget vedtek forskotteringa på 100 mill kroner, vil arbeidet med å førebu oppstart av prosjektet bli intensivert. Eiga sak om godkjenning av oppstart skal leggjast fram for fylkestinget når konkurransegrunnlag med oppdatert kostnadsoverslag ligg føre.