Hordaland fylkesutval rår til at fylkestinget skal godkjenna ei kostnadsramme på 180 mill. kr for bussanlegget som skal byggjast på Haukås i Bergen. Kostnadsramma er auka med 50 mill. kr i samband med anlegget også skal omfatta verkstad.
Fylkestinget skal handsama saka 8.-9. juni i Ulvik.
Verkstad im tillegg
I utbyggingsplanen var det opphaveleg ikkje teke med lokale til verkstad, då verkstadtenester skulle kjøpast hjå merkeverskader i bergensområdet. Firmaet Ricco AS, som har stor kompetanse knytt til opparbeiding og drift av bussverkstader, har sterkt rådd til at det vert bygd verkstad for buss som del av anlegget på Haukås. Grunnen er manglande verkstadkapasitet hjå merkeverkstadane i området.
Anlegget på Haukås får ein samla bygningsmasse på 3 600 m2 og er dimensjonert for 163 bussar.
Tredelt
Anlegget er fysisk delt i tre delar.
Ein del inneheld kontor for administrasjon og sosiale rom for sjåførar. Arealet er på to etasjar med resepsjon, kontor og oppgjersrom i 1. etasje. I 2. etasje er det garderobar, toalett og kantine/møteromfor sjåførar. Samla areal er ca. 600 m2.
Den andre delen inneheld hallar for innvendig og utvendig reinhald av bussane. Samla areal er ca. 900 m2.
Verkstaden er dimensjonert for 8 leddbussar. I tillegg er det kontor, garderobe, spise- og møterom. Denne delen kan også skiljast ut som ei eiga verksemd. Samla areal er 2.100 m2. Etter signal om gassbussar, er det teke omsyn til tryggleikstiltak knytt til mogleg gasslekkasje frå bussane.
Bussoppstilling
Uteanlegget får 163 bussoppstillingsplassar fordelt på 105 leddbussar og 58 normalvognar. Det vert 98 parkeringsplassar for personbil og 18 sykkelparkeringsplassar under tak. Eit eventuelt gassanlegg vert levert av bussoperatøren som sjølv tar kostnadane med installering på tomten.
Pressemelding frå fylkesutvalet sitt møte 20. mai