Utdanningsprogrammet for Teknikk og industriell produksjon (TIP) gjev elevar med ønskje om ei framtid innan industri og tekniske fag naudsynt grunnopplæring i sentrale fagdisiplinar. For TIP-faga inneber det innføring i mellom anna datastyrt konstruksjon og produksjon, sveising, mekanikk, prosess, kran- og løfteoperasjonar og overflatebehandling.
Fagdisiplinane har gjennomgått ei rivande teknisk utvikling siste tiåra. For å etterleva kundane sine krav om kostnadseffektiv og konkurransedyktig produksjon, er dei avhengig av personell som beherskar moderne og tidsmessig utstyr.
Omfattande behov for oppgradering
TIP-fag finst ved meir enn 20 av dei 45 vidaregåande skulane i fylket. Mange av verkstadane har eit omfattande behov for utskifting av utdatert og gammalt utstyr. Oppdatering av verkstadane og installasjon av moderne utstyr og avanserte maskiner er naudsynt, skal elevane vera førebudde på den kvardagen som ventar dei ute i arbeidslivet.
Utstyret som elevane disponerer i opplæringa vil samstundes ha stor betyding for kor attraktive elevane skal framstå for potensielle, framtidige arbeidsgjevarar.
Eit løft som monar
Opplærings- og helseutvalet har merka seg situasjonen, og legg opp til eit løft som monar ved dei einskilde skulane. Årets løyving på 13 millionar er ei vidareføring av at det i fjor vart øyremerka ti millionar kroner i investeringsmidlar til TIP-faga.
Knarvik vidaregåande skule var mellom dei skulane som fekk midlar i fjor. Dei to millionane har bidrege til at elevane i år kan få opplæring på moderne produksjonsutstyr i samsvar med det dei kan forventa å arbeida med når dei kjem ut i arbeidslivet.
Dei nye verkstadlokala som vart tekne i bruk sist haust er utstyrt med tidsmessig datastyrt og dataassistert utstyr (CNC – Computer Numerical Control) for fresing, dreiing, gjenging, og sveising.
Desse vidaregåande skulane får investeringsmidlar til TIP-fag i år:
Stord 2 millionar kroner
Osterøy 2 millionar kroner
Os 2 millionar kroner
Austevoll 1,4 millionar kroner
Odda 1 million kroner
Arna 1 million kroner
Austrheim 1 million kroner
Voss 1 million kroner
Åsane 800.000 kroner
Kvinnherad 800.000 kroner
Åtte av dei vidaregåande skulane i fylket har ikkje motteke investeringsmidlar til TIP-faga dei siste to åra.
Fordeling av investeringsmidlane
22 millionar kroner av investeringsmidlane er øyremerka andre føremål. Opplærings- og helseutvalet fordelte dei 35 millionane som er avsett til utstyr ved vidaregåande skular i 2010 slik:
10 mill. kr - IT- midlar
8 mill. kr - Nordahl Grieg videregående skole, undervisningsmidlar til sluttføring av skulen
4 mill. kr - Bergen Maritime videregående skole
13 mill. kr - Utstyrsmidlar til TiP
TIP-elevar søkjer læreplass