Køprising i Bergen frå 2012

Hordaland fylkesutval går inn for at det skal innførast tidsdifferensierte bompengar – køprising – i Bergen frå 2012. Vedtaket er gjort med 9 (Ap, SV, Sp, V, KrF) mot 6 (H, Frp) røyster.

Handeland (Ap) fremja på vegner av Ap og V fylkesrådmannen si innstilling i saka. Det var dette forslaget som vart vedteke med ni mot seks røyster.

Belønning

Fylkesutvalet legg til grunn at ei ordning med tidsdifferensierte bompengar vil vera knytt til auka statleg medverknad i finansiering av vidare utbygging av bybanen i Bergen, til dømes gjennom tilskot frå belønningsordninga.

Bergen og staten

Fylkesutvalet legg til grunn at ein må koma tilbake til den konkrete utforminga av regimet for tidsdifferensierte bompengar etter handsaming i Bergen kommune og drøftingar med Samferdselsdepartementet.

Fylkesutvalet understrekar at eventuell innføring av tidsdifferensierte bompengar krev lokalpolitisk tilslutning og godkjenning frå sentrale styresmakter.

Redusera biltrafikken

Innføring av køprising vert gjort for å redusera biltrafikken i bergensområdet. Frå samferdselsdepartementet er innføring av trafikkregulerande tiltak ein sentral føresetnad for å koma med i den firårige ordninga for tildeling av belønningsmidlar til kollektivtrafikken.

Mindre ureining

Fleire omsyn gjer det nødvendig å finna permanente løysingar for å redusera biltrafikken i bergensområdet, heiter det i saksutgreiinga. Dette gjeld mellom anna kapasitetsproblem på vegnettet, behov for å redusera klimagassutslepp og lokal luftforureining. Den dramatiske situasjonen knytt til lokal luftforureining i Bergen sist vinter tilseier at det er nødvendig å finne effektive løysingar så snart som råd.

Bybanen

Finansiering av vidare utbygging av bybanen etter 2. byggjesteg (Nesttun-Lagunen) er ikkje avklart. Bompengar vil vera eit nødvendig element også i den vidare utbygginga, men det vill i tillegg vera nødvendig med auka statleg medfinansiering. Fylkeskommunen meiner dette til dømes kan skje gjennom tilskot frå belønningsordninga.

SV-forslag

Mette Holmefjord Olsen (SV) fremja eige forslag, og røysta primært for dette. Forslaget fekk berre hennar røyst, og ho slutta seg subsidiært til forslaget frå AP/V.

I forslaget frå SV heiter det at fylkesutvalet på prinsipielt grunnlag skal vedta å innføra køprising. Vidare at fylkesutvalet skal ta initiativ overfor sentrale styresmakter for å utvikla eit køpris-regime etter modell frå Stockholm. Målet skal vera å få bygd ut kollektivtilbod i Bergen som kan vera eit reelt alternativ til privatbilen.

SV har slik protokollmerknad i saka: «SV føreset at evt. meirinntekter frå tidsdifferensierte bompengar vert brukte til investeringar i bybanen. Eventuell auke i belønningsmidlar frå staten skal brukast til auka ruteproduksjon og framkomsttiltak i Bergen.