”Tres Hombres” gjekk for fulle segl frå hamna i Bergen og ut Byfjorden på veg over Nordsjøen til Cardiff i Wales på same måte som seglbåtane gjekk ”i gamle dagar” med tømmer til dei britiske øyane. (alle foto: Bjarte Brask Eriksen)
Gamal tradisjon
Seglbåten følgjer i dei gamle tradisjonane med å levere tømmer frå Vestlandet til dei britiske øyar. I tillegg til tømmer, er det beste av norsk mat og drikke som er om bord. Den skal serverast på den internasjonale mat- og drikkefestivalen i Cardiff 9. til 11. juli, og på Oxfordsymposiet om mat og kokkekunst same helga. Maten omfattar mellom anna røykjelaks og aure frå Austevoll, klippfisk, tørrfisk, gullsild, fenalår, geitost frå Undredal, kjukkmjølk frå Røros, øl og akevitt. Trelasten skal brukast til å restaurere sjømannskyrkja i Cardiff. Dette er malmfuru, hogd på Osterøy, som er naturleg konservert av kvae.
Byggjeleiar for den norske delen av restaureringa av sjømannskyrkja i Cardiff, Jan Floen (t.h.) lastar tømmer frå Osterøy til lærling Kristian Stadheim Kulild som igjen leverer vidare til Mandez Dabkevicius om bord i seglskuten.
Ferdig til 17. mai
– Vi er med på restaureringa og utviding av sjømannskyrkja, slik at den skal bli meir universelt utforma. Sjømannskyrkja skal få betre fasilitetar, kjøkken og toalett. Alt skal stå ferdig til 17. mai neste år, seier fylkesordførar Toril Selsvold Nyborg.
Fylkesordførar Torill Selsvold Nyborg er svært nøgd med at Hordaland fylkeskommune har engasjert seg i restaureringa av sjømannskyrkja i Cardiff og at tømmeret går med miljøvennleg transport over Nordsjøen. Terje Inderhaug (t.v.) er koordinator for prosjektet og Arjen van der Veen er kaptein på seglskuta.
Miljøvennleg frakt
Turen går med seglbåten ”Tres Hombres” frå Nederland. Det er ein 32 meter lang seglbåt på 100 tonn bruttotonnasje. Hordaland fylkeskommune ønskjer å framstå som ei ”fairtrade”-bedrift og har i tillegg vedteke ein klimaplan. Frakt av mat og trelast over Nordsjøen utan bruk av motorkraft og utan utslepp er difor i samsvar med dette.
– Dette er tørrfisk frå Henningsvær i Lofoten, miljøvennleg helsekost, ikkje noko er tilsett, ikkje ein gong salt. Den er hengt opp og vindtørka. Vi får ikkje noko meir miljøvennleg enn dette. Tørrfisk er fundamentet for handelsbyen Bergen. I meir enn 1000 år har det gått tørrfisk frå Bergen og ut i verda, seier Kjell Moberg, leiar av Bryggens Venner og viser tørrfisken til fylkesordførar Torill Selsvold Nyborg og kokken Pål Drønen.
God vind
Kaptein Arjen van der Veen viser oss rundt på båten og forklårer at det er ingen maskiner om bord. Båten blir driven av berre segl og vind.
– Vi kjem til å reise med ein fart av sju knop når vi legg ut frå Bergen hamn og aukar farten til 11-12 knop når vi kjem ut i ope farvatn. Vinden er god, seier kapteinen Arjen van der Veen som har røynsler gjennom 10 år med båten. Nødvendig straum om bord, som til lys og navigeringsutstyr, etc. blir laga av vind- og sjøkraft. Seglbåten blir brukt til karbon-nøytral frakt på verdshava og har base i Den Helder i Nederland.
– Hadde båten i staden gått med motorkraft hadde vi brukt 2,9 tonn diesel og sleppt ut 7,6 tonn koldioksyd, opplyser koordinator Terje Inderhaug ved roret på seglbåten ”Tres Hombres”.
Nullutslepp
– Vi har rekna på dette. Hadde båten i staden gått med motorkraft hadde vi brukt 2,9 tonn diesel og sleppt ut 7,6 tonn koldioksyd. Vi ønskjer å framstå som miljøvennleg, seier koordinator for prosjektet i Hordaland fylkeskommune, Terje Inderhaug, som er med på den historiske seglturen.
450.000 kroner
Totalt skal Hordaland fylkeskommune bruke om lag 450.000 kroner på deltakinga på festivalen og til restaureringa av sjømannskyrkja.
Seglbåten ”Tres Hombres” er ein 32 meter lang brigg på 100 tonn brutto og skal frakte det beste av norsk mat, drikke og tømmer over Nordsjøen.