Måndag 21. juni klokka 13.00 skal ei delstrekning av fylkesveg 542 Hollundskjosen–Hollundsdalen offisielt opnast. Markeringa skjer ved rundkøyringa i Hollundskjosen og fylkesordførar Torill Selsvold Nyborg skal utføra den høgtidelege handlinga.
Om prosjektet
Dette er andre større prosjektet i Bømlopakken. Det første var ei strekning av fv. 541 Langevåg-Løvegapet som opna i august 2008. I tillegg er det utført utbetring av Langevåg-Eidesvik på fv. 11.
Prosjektet som vert opna no, gjeld i hovudsak opprusting av dagens fv. 542 (tidlegare riksveg) og ny tilknyting av Idrettsvegen til fv. 542.
Bømlopakken: Ei delstrekning av fylkesveg 542 Hollundskjosen–Hollundsdalen vert offisielt opna måndag 21. juni.
Dette er utført
• Krysset i Hollundskjosen er bygd om til rundkøyring med 40 meter i ytre diameter. Idrettsvegen og fv. 18 er ført inn til denne rundkøyringa. Dagens kryss mellom Idrettsvegen og fv. 542 vart fjerna og nedre del av Idrettsvegen har fått ny trasé.
• Fv. 542 mellom Hollundskjosen og Hollundsdalen industriområde er utforma etter vegnormalane sin standard med to felt og separat gang-/sykkelveg. I delar av eksisterande veg er det skifta ut massar for å få ein meir stabil veg.
• Krysset til Hollundsdalen industriområde er bygd om til rundkøyring.
• Alt vatn-, avløps- og overvatn- og drenssystem er skifta ut.
• Det er etablert ei ny, felles kabelgrøft med komplett nytt veglysanlegg som inneheld 40 nye lyspunkt.
Kostnad
Mesta entreprenør AS har vore utførande hovudentreprenør. Kontraktsummen for denne utbygginga er på ca. 25,5 mill. kr eks. mva.
Utbygginga omfatta sprening av 31 000 m3 fjell og flytting av 35 000 m3 jord og lausmassar.
Lenkje:
Meir om Bømlopakken
Synnøve Lien, Statens vegvesen/Stanley Hauge 21.06.2010 08:21