Talet på elevar som ikkje fullfører vidaregåande opplæring i Hordaland skal reduserast med fem prosent. Kartlegging av risikogrupper og tiltak retta mot minoritetsspråklege elevar er dei to postane som får største løyvingane i framlegget til handlingsplan
I 2010 har fylkeskommunen sett av 7,5 millionar kroner til målretta tiltak mot fråfall.
Framlegget til handlingsplan er utarbeidd på grunnlag av ei kartlegging utført i 2009.
Tidleg innsats
Handlingsplanen legg opp til å identifisera og gripa fatt i dei svakaste elevane så tidleg som mogeleg. For å få dette til skal samarbeidet mellom grunnskule og vidaregåande skule betrast. Fleire av tiltaka vil særleg verta retta mot elevar med svake resultat frå ungdomsskulen og første året i vidaregåande.
Generell kompetanseheving av lærarar, og tiltak retta mot skular med særleg stort fråfall er det også funne rom for i planen.
Fagopplæringskontoret
Fylkestinget har merka seg at fagopplæringskontoret må sikrast tilstrekkjelege ressursar til å følgja opp læreverksemder og lærlingar, heiter det i eit eige punkt i vedtaket.