Regionale og lokale norske styremakter må i aukande grad ta omsyn til lovverket i EØS-området. Meir enn 70 prosent av sakene i norske kommunar og fylkesting i 2008 var EØS-relevante, ifølgje ei nasjonal undersøking.
- Hordaland skal vera i front av fylkeskommunane når det gjeld internasjonalt arbeid, fastslår regionaldirektør Jan Per Styve i Hordaland fylkeskommune.
- Etableringa av internasjonal seksjon skal bidra til å styrka konkurransekrafta til heile regionen. Dette skal først og framst skje gjennom tiltak som er eigna til å understøtta fylkeskommunen si rolle som regional utviklingsaktør, seier regionaldirektøren.
Overordna ansvar
Rolla som regional utviklingsaktør tilseier at fylkeskommunen har eit overordna ansvar for det internasjonale arbeidet. Fylkeskommunen skal ha eit aktivt internasjonalt engasjement for å fremja gjensidig kulturforståing og styrka Hordaland som ein attraktiv og konkurransedyktig region.
Den internasjonale strategien har fire overordna temaområde:
- Ungdom, utdanning og kulturutveksling
- Kunnskapsbasert innovasjon
- Klima, energi og miljø
- Sjøretta aktivitetar
Nyoppretta Internasjonal seksjon skal vidareføra det arbeidet som tidlegare har vore utført av Europakontoret:
- Hordaland er i dag mellom dei framste fylka når det gjeld internasjonal aktivitet. No skal vi verta enno betre, seier Styve.
Meir målretta
Det å jobba internasjonalt krev spisskompetanse. Internasjonal seksjon skal fungera som ein lyttepost og ein vegvisar til alle dei mogelegheitane som ligg i europeisk samarbeid.
Etableringa signaliserer at arbeidet vil verta meir målretta i samsvar med dei overordna strategiske føringane frå fylkestinget. Aktivitetane vil i større grad verta spissa inn mot fagavdelingane sine behov. Rådgjevinga og det koordinerande arbeidet ovanfor kommunane vil samstundes verta styrka, signaliserer regionaldirektøren.
Seksjonen skal samstundes vera ein aktiv oppdragsgjevar med ei styrka bestellarrolle ovanfor Vest-Norge sitt Brusselkontor.
Strategiske prioriteringar
Den internasjonale strategien peikar ut fire prioriterte arenaer for samarbeid:
- Deltaking i internasjonale organisasjonar
- Deltaking i program og prosjektarbeid
- Etablering og styrking av tilhøvet til samarbeidsregionar
- Oppdragsgjevar overfor Vest-Norges Brusselkontor.
Internasjonal seksjon vil få 6 – 7 stillingar. Det vert no arbeidd med å rekruttera seksjonsleiar.