To skuleelevar på Mbala, fylkesordførar Torill Selsvold Nyborg, rektor Per Morken, Sotra, rektor Mambala og direktør for fagutvikling, Georgina, frå Utdanningsdepartementet. (foto: Svein-Erik Fjeld)
Tett og godt samarbeid
Dei seinare åra har det utvikla seg eit tett og godt samarbeid mellom opplæringsavdelinga, 
Sotra vidaregåande og skulemyndigheitene i Zambia. Først ute var Sotra og Mbala High School i Northern Province med å starte arbeidet med lokalt entrepre-nørskap under samle-omgrepet hjelp til sjølvhjelp.
Opninga av pumpe-stasjonen, rektor Mambala på Mbala High School og ein glad fylkesordførar Torill Selsvold Nyborg. (foto: Svein-Erik Fjeld)
Treng godkjent fagplan
– Samarbeidet kom i gang etter ein idé frå lærar på Sotra i 2002. I 2006 byrja lærarar frå Sotra med å gi opplæring i korleis skulen i Zambia skulle utvikle lokalt entreprenørskap på ulike felt. I Lusaka førre veka møtte fylkesordføraren leiinga for undervisningsdepartementet for å drøfte utfordringar som prosjektet har støytt på undervegs, fortel spesialrådgjevar Einar Gilberg på opplæring.
Elevar i ei elevbedrift i Mbala. (foto: Svein-Erik Fjeld)
Som til dømes?
- At faget treng ein godkjent fagplan og at elevane kan få høve til å avleggje eksamen i faget. Ei anna utfordring er å bøte på utskiftinga av lærarar i prosjektet. Slik det har vore, kan den lokale kompetansen prosjektet byggjer opp, lett smuldra vekk nettopp på grunn av hyppige skifte.Ynskjet frå fylkeskommunen er at lærarskulane både skal sende studentar i praksisperiodar til skulane, og også etter ferdig utdanning. Då vonar vi at opplegget får ei meir stabil ramme, seier Gilberg.
Reint og klart vatn
Etterpå bar det ut i bushen, og rektor Per Morken på Sotra fekk gleda av å opne ein ny pumpestasjon på Mbala High School med mangelvara reint og klart vatn. Kvart år går meir enn 200.000 kroner frå elevstyrte Aksjon Dagsverk til skulen i det sørlege Afrika.
- Midlane går til oppjustering, alt frå sengar, madrassar, måling til førefallande arbeid. Sotra har ikkje nok med det og betaler skulepengar, 1000 kroner i året for til saman 100 økonomisk svaktstilte elevar på skulen. Det er ikkje vanskeleg å sjå nytteverdien. Den og optimismen finn vi spor av i alt rundt skulen, seier Per Morken.
Skulekoret i Mbala under opninga av pumpestasjonen, som var ei gåve frå Sotra vidaregåande skule. (foto: Svein-Erik Fjeld)