- Det har teke lang tid å få etablert ei fagleg plattform for Folgefonnsenteret, men med samarbeidet som er inngått med Bjerknessenteret for klimaforsking, er denne svært viktige delen no på plass, seier prosjektleiar Knut Førland.
Prosjektleiar Knut Førland (t.v) og direktør Eystein Jansen signerer avtalen mellom Folgefonnsenteret og Bjerknessenteret i Rosendal 7. januar 2010. (Foto: Grenda)
Forskings- og formidlingssenter
Han fortel at målet er å skapa eit forskings- og formidlingssenter med aktivitetar knytt til klimaforsking og bruk av isbrear som klimaindikatorar. I tillegg til forsking vil formidling stå sentralt, til dømes gjennom program tilknytta skular. Plasseringa av senteret ved foten av Folgefonna skapar ei unik muligheit for å trekkja natur og miljø direkte inn i undervisninga.
Bjerknessenteret ønskjer også eit tett samarbeid med dei andre kommunane som grensar inn til Folgefonna Nasjonalpark (Etne, Odda, Ullensvang og Jondal). I det vidare arbeidet vil det såleis bli lagt opp til eit tett samarbeid med Stiftinga Folgefonna Nasjonalparksenter.
Regionalt prosjekt
- Med den plattforma Folgefonnsenteret no har fått er prosjektet i endå større grad enn tidlegare eit regionalt prosjekt. Senteret vil setja Folgefonnhalvøya på det internasjonale kartet, og dette vil gi positive ringverknader for mellom anna reiselivet i regionen, understrekar Førland.
Bjerknessenteret går inn i prosjektet med to svært anerkjente klimaforskarar, nemleg førsteamanuensis Jostein Bakke og professor Atle Nesje. Begge to har eit nært forhold til Folgefonna, og var sentrale aktørar i samband med boka ”Folgefonna og fjordbygdene” som kom ut seinhaustes 2008.
Nesje var også ein sentral aktør i oppstarten av Norsk Bremuseum i Fjærland, og var også fagleg involvert i Jostedalsbreen nasjonalparksenter i Stryn og Breheimsenteret i Jostedalen. Erfaringane hans frå desse prosjekta vil vera viktige i det vidare arbeidet med Folgefonnsenteret.
Skapar nye arbeidsplassar
Førland legg til at ambisjonen er at senteret skal gi nye arbeidsplassar. I tillegg vil kurs, seminar og konferansar i tilknyting til Bjerknessenteret sine aktivitetar på sikt kunna representera ei ikkje ubetydeleg verdiskaping i området.
Hordaland fylkeskommune har løyvd 2,5 millionar kroner til prosjektet, noko prosjektleiaren vonar vert vidareført.
- Med den faglege plattforma Folgefonnsenteret no har fått, vil vi også framover arbeida aktivt for å få statlege midlar til prosjektet, seier prosjektleiar Knut Førland.
Les meir om samarbeidet her:
http://www.uib.no/form/nyheter/2010/01/bjerknessenteret-i-folgefonnsamarbeid
http://www.bt.no/nyheter/klima/Folgefonna-blir-klima-indikator-997984.html
http://www.kvinnheringen.no/nyhende/article4793606.ece
http://www1.nrk.no/nett-tv/indeks/196635
Grenda 09 01 10 Forside.pdf
Grenda 09 01 10 Side 5.pdf