Fylkesordførar Torill Selsvold Nyborg ynskjer over 150 deltakarar velkomen til det 5. nyårsmøtet.
Over 150 sentrale aktørar innan politikk, nærings- og samfunnsliv, forsking og utdanning møttest til samråd om kva som er dei viktigaste utfordringane for Hordaland i 2010 på Radisson Blu Hotel Norge tysdag 5. januar i Bergen. «Korleis kan vi i fellesskap fremje Hordaland sine interesser?» var hovudagenda på møtet der stortingsrepresentantane frå Hordaland var særskilt inviterte.
Sterke innleiarar
Blant innleiarane på det femte nyårsmøtet på rad var helseminister Anne-Grete Strøm-Erichsen, stortingsrepresentant Per Rune Henriksen, byrådsleiar Monica Mæland, Tom Remlow (adm. dir Den Norske Opera og Ballett) og professor Arild Hervik (Høgskolen i Molde) per telefon. Professor Ole Didrik Lærum avrunda det heile med sine skråblikk på lukke.
Samarbeid gjev styrke
- Fylkeskommunen stiller opp og tek eit samla ansvar for utvikling av heile vårt sterke fylke. Men vi må bli flinkare til å jobba saman. Vi har gode føresetnader for vidare vekst, og eit stort ansvar for å skapa ei balansert og berekraftig utvikling. Det er min viktigaste bodskap her i dag, innleia fylkesordførar Torill Selsvold Nyborg.
Ho tok vidare for seg fylkeskommunen sine nye oppgåver innan samferdsle og folkehelsearbeid etter forvaltningsreforma som treddetrådte i kraft 1.1.2010. Ho sveipa også innom finanskrisa, industrien, strategiar for energifylket Hordaland, kollektivsatsinga, klimaplanen, kompetansebygging og samarbeid med forskings- og utviklingsaktørar.
Tettare strategisk samarbeid
- Hordalandsbenken og fylkesutvalet bør samlast to gonger årleg for å samlast om dei sakene vi er samde om, og kva for saker som skal prioriterast. Med ei samla røyst kan vi nå fram i regjeringa, hos byråkratane og politikarar elles i landet med saker som er viktige for Vestlandsregionen, meiner Stortingsrepresentant Per Rune Henriksen (Ap) som sit i energi- og miljøkomiteen.
Henriksen tok også til orde for at dei nye reglane for strandsoneforvaltninga er for strenge for Hordaland sin del. – Dersom desse retningslinene vert vedtekne, strir dei imot føresetnadane som låg til grunn for å seie ja til å laga nye, meiner Henriksen.
Fronta samhandlingsreforma
Høgre-leiar Erna Solberg gjekk i rette med helseminister Anne-Grete Strøm-Erichsen sitt innlegg om den komande samhandlingsreforma som legg opp til 20 prosent kommunal finansiering av helseutgiftene for å stimulerast til å arbeida førebyggjande. - Skal det vere slik, vert det inga samhandlingsreform, seier Solberg.
Helseminister Anne-Grete Strøm-Erichsen fronta den nye samhandlingsreforma på nyårsmøtet. (Foto: Stanley Hauge)
Statsråden repliserte av helsereforma no er på høyring. Saka er ikkje avgjort og ho er open for innspel for å få brei oppslutnad om ei reform som mange alt har stilt seg positive til.
Ventar ny ordrebølgje
Professor Arild Hervik frå Høgskolen i Molde heldt sitt føredrag om maritim sektor per telefon. Han kom med ein optimistisk bodskap, og ser for seg ei ny ordrebølgje for vestlandsverfta i 2011/12.
Fylkesordførar Torill Selsvold Nyborg la vekt på samla styrke under nyårsmøtet som er blitt ein sentral møteplass for beslutningstakarar.
Viktig møteplass
Etter kommentarane å døma frå fleire av deltakarane, har fylkesordføraren sitt nyttårsmøte posisjonert seg som ein svært viktig møteplass for å nå føremålet med konferansen: å fremja Hordaland sine interesser nasjonalt.