Opplæring og informasjon om ny plandel i Plan- og bygningsloven har vore i fokus gjennom heile 2009. No kjem eit tilbod om formell kompetansegjevande utdanning i planrett.
Fagplansamarbeid UiB , fylkeskommunen og fylkesmannen
Kunnskap om lovar og reglar som gjeld for planlegging av samfunn og arealbruk er grunnleggjande for å fremja ei berekraftig utvikling. Opplæring og informasjon om ny plandel i Plan- og bygningsloven har vore i fokus gjennom heile 2009. No kjem eit tilbod om formell kompetansegjevande utdanning i planrett forankra ved Juridisk fakultet, Universitetet i Bergen.
Tilbodet er utvikla etter eit initiativ frå Hordaland fylkeskommune og Fylkesmannen i Hordaland. I fellesskap har dei regionale fagorgana kome med innspel til ein fagplan ut i frå behova som er registrert i praktisk planlegging i Hordaland. Fakultetet har utvikla ein fagplan i tråd med reglar og normer som gjeld for slike og fakultetsstyret ved Juridisk fakultet godkjende fagplanen i desembermøtet.
Tilpassa personar i arbeid
Tilbodet er tilpassa personar som er i arbeid gjennom tre tredagars samlingar i Bergen. 15 studiepoeng tilsvarar 5 ”gamle” vekttal og skal vera overkomeleg for arbeidstakarar. Kurset startar i mai og vil avsluttast med skriftleg eksamen der dato alt er fastsett til 15.oktober 2010. Kurset kan inngå som ein del av bachelor- eller mastergrad. Det blir arbeidd med tilsvarande modular for andre plantema i samarbeid med Universitets – og høyskolenettverket på Vestlandet.
Rabatt for kommunalt tilsette i Hordaland
SEVU (Senter for etter- og vidareutdanning ved UiB) har det praktiske ansvaret for gjennomføring av kurset. Kommunalt tilsette i Hordaland får rabatt på dette første kurset, og det blir arbeidd med å framskaffa midlar som kan stimulera fleste mogeleg kommunar til å senda deltakarar.
Bruk sjansen!
Brukarundersøkingar og tilbakemeldingar frå planfeltet i Hordaland peikar på kunnskap om lovverk som mest mangelfull. No har kommunane ein gylden sjanse til å få oppgradert kompetansenivået. Eit vellukka kurs vil i tillegg skapa grunnlag for eit varig utdanningstilbod for dette og andre plantema. På sikt vil det styrke plankompetansen regionalt og samspelet mellom forskings- og utdanningsmiljø på Vestlandet og praktikarane i samfunnsplanlegging.
Meir om kurset
Påmelding