– Endå ein gong kan vi gle oss over at treet skal lysa for oss i førjulstida. Dette er ein årviss tradisjon som vi er svært glade for at Hordaland opprettheld, sa Orknøy-ordførar Stephen Hagan.
Årets juletre frå Hordaland er tent framfor St. Magnus-katedralen. Fylkesordførar Torill Selsvold Nyborg saman med ordførar Stephen Hagan, Orknøyane, lucia-jenter og vektarane.
Festival
Julefestivalen i Kirkwall første helga i desember omfattar St. Lucia-program i St. Magnus-katedralen med påfølgjande lystenning og deretter lystenningsfest i regi av venskapsforeininga Orknøyane-Noreg. Dette skjer laurdag. Søndag er det gudsteneste på føremiddag og julekonsert om kvelden.
"Vikinggjeng" frå Shetland danna espalier framfor inngangen til St. Magnus-katedralen.
Prosesjon
Før lystenningskonserten i katedralen startar går offisielle gjester i prosesjon frå Town Hall like overfor katedralen. Utanfor katedralen danna årets «vikinggjeng» frå Shetland espalier for opptoget og andre gjester.
Presten Fraser Macnaughton uttrykte stor takk til lucia-jentene.
St. Lucia
Inne i kyrkja er St. Lucia-programmet ein vesentleg del av samlinga. Unge jenter gjennomførte ein flott presentasjon. Presten Fraser Macnaughton uttrykte både stor takk til jentene og frykt for rekrutteringa av framtidige «lucier».
Norsk musikk
Ein norsk musikkvartett framførde norske folkesongar og tradisjonell jassmusikk som ein del av konsertane laurdag og søndag.
Dei fire som utgjorde «hordalandskvartetten» var frå venstre: Thomas Nøkling (saksofon), Sigurd Ulveseth (bassist), Trym Bjønnes (gitar og song) og Kim André Rysstad (vokal).
Konsertinnslaga til kvartetten vart svært godt mottekne og vart sette stor pris på. I tillegg til applausen spurde folk om det ikkje var CD-ar å få kjøpt av musikken deira. Men denne gjengen har ikkje gjeve ut musikk saman. Det er fylkeskonsertane i Hordaland som har samla dei i skulekonsertprogrammet «Ein stjerneklar konsert».
Fylkesordføraren
Fylkesordførar Torill Selsvold Nyborg trekte i sin tale i katedralen fram at kontakta mellom venskapsfylka – Hordaland og Orknøyane – har vore stor gjennom året. Det gjeld innan både kultur og idrett og i 2010 har også fylkeseldrerådet vårt vitja Orknøyane.
Selsvold Nyborg sa at ho var imponert over kor entusiastisk lokalsamfunnet tek del i og støttar opp om julefestivalen i Kirkwall.
Takk
Ordførar Stephen Hagen retta ei stor takk til Hordaland som kvart år syter for at folk på Orknøyane får oppleva norske musikarar, og at det år etter år er brei kulturell kontakt mellom venskapsfylka.
Orknøy-ordførar Stephen Hagen trekte fram dei tøffe økonomiske utsiktene i Storbritannia og at dette ville merkast på Orknøyane dei komande åra.
Finanskrisa
Orknøyordføraren nytta også høvet til å snakka til den fullsette katedralen om den finansielle krisa som Storbritannia er råka av, og som vil påverka orknøysamfunnet i stor grad dei komande åra.
Alt det komande budsjettåret, som startar i april 2011, vil det verta mindre å fordela til gode og nødvendige tenester. Utsiktene er også at det vil verta tøffare i løpet av den komande treårsperioden – kutt på 12 % eller meir står for tur.
I 2011 ser det ut til at det må kuttast nærare 40 mill. kr av eit budsjett på ca. 850 mill. kr.
Juletreet som Hordaland gjev til Orknøyane er av praktiske årsaker hogge i Grimstad dei siste åra. Grismtad kommune har gjeve som står inne i katedralen. Fylkesordførar Torill Selsvold Nyborg takka Grismtad ved Ove Bach for samarbeidet.
Grimstad
Treet som Hordaland gjev til Orknøyane er av praktiske transportgrunnar hogge i Grimstad dei siste åra. Sørlendingane har også hatt kontakt med Orknøyane gjennom mange år. Dei gjev eit mindre tre som står inne i katedralen og vert tent under gudstenesta søndagen. Neste år er det 25. gong grimstadtreet skal tennast, så då vert det jubileum for oss, seier Ove Bach frå Grimstad kommune.
ONFA-fest
Lystenningsfesten til venskapsforeininga (ONFA – Orkney Norway Friendship Association) er også ein årviss tradisjon. Arrangementet vert halde i Town Hall. På programmet står dans, utlodding og kanapéservering på orknøyvis. I tillegg til å vera eit trivleg arrangement er det også ei inntektskjelde for foreininga.
Lotteri er eit fast innslag på venskapsforeininga Orknøyane-Noreg sitt årlege arrangement i samband med lystenninga.
Lenkje:
ONFA – Orkney Norway Friendship Association