Fylkeskultursjef
I åra 1994-1997 var ho kultursjef i Os og frå 2003 fylkeskultursjef i Hordaland. Frå 2008 leia ho det internasjonale arbeidet i Hordaland fylkeskommune. I år har ho byrja i stillinga som utsmykkings-/kunstkoordinator i fylkeskommunen, der ho har ansvar for verneverdige bygningar og anlegg, og kunst i det offentlege rom i dei vidaregåande skulane i fylket.
Olympiaden
Astrup har vore med i realiseringa av store nasjonale kultursatsingar. Først var ho prosjektleiar i kulturavdelinga i LOOC (1992-1994) der ho hadde ansvar for fleire samtidskunstprosjekt i kulturprogrammet før og under vinterolympiaden på Lillehammer. I Kulturbyen Bergen 2000, i perioden 1997-2000, var ho programkoordinator for visuell kunst og arkitektur.
Internasjonalt
I Bergen og Lillehammer har ho arbeidd innanfor kunstnarstyrt formidling som utstillingsleiar ved Hordaland kunstsenter i to periodar, og som prosjektleiar i kunstprosjektet ”Steder” i regi av Kunstnarsenteret i Oppland 2002 – 2003.
Internasjonalt arbeid har inngått i arbeidet hennar med kunst. I perioden 1988-1991 var ho tilsett som utstillingsleiar ved Nordiskt Konstcentrum i Helsingfors med heile Norden og dei baltiske landa som arbeidsfelt.
Formidlingsdelen av kunst- og kulturarbeidet hadde ho og bakgrunn for gjennom meir enn 10 års arbeid som pedagog i Tromsø og Os kommunar.
Kultursjef i Os
I åra 1994-1997 var Astrup kultursjef i Os kommune. Ho gjekk straks i gang med å etablere ”Allaktivitetshuset” der Os ungdomsklubb inngjekk som ein av mange aktivitetar. Dette kravde utstrakt evne til samarbeid og huset framstår i dag som svært vellukka til glede for kommunen og alle som har aktivitet der. Astrup hadde og ansvaret for å etablere Oselvarverkstaden og har gjort ein kjempejobb med å utvikle kulturlivet i kommunen.
I det lokale kulturlivet i Os har ho også bidratt på kulturfeltet, og har hatt styreverv i Fritio i Os og i Os kulturutvikling.
Kunstkoordinator
Sidan 2003 har Hordaland fylkeskommune vore arbeidsplassen hennar. Dei fem første åra som fylkeskultursjef. I 2008 vart ho leiar for internasjonale arbeidet til fylkeskommunen. I år overtok ho stillinga som kunstkoordinator.
Ansvar for to kulturpolitiske reformer
Som fylkeskultursjef fekk ho ansvaret for to kulturpolitiske reformer: Den kulturelle skulesekken og museumsreforma. Ho vart medlem av den nasjonale referansegruppa for Den kulturelle skulesekken oppretta av kulturdepartementet i 2003. Ingebjørg Astrup har vært medlem av styra bak sentrale arrangement som Griegmarkeringa 2007 og Hauge-Tveittjubiléet 2008.
Geir Davidsen, personaldirektør Hordaland fylkeskommune