Kaptein Nick Bates og fylkesvaraordførar Tom-Christer Nilsen på Fløyen med eitt av dei største passasjerskipa i verda, Queen Mary 2, mellom seg på Bergen hamn. (alle foto: Bjarte Brask Eriksen)
43 år i Edinburgh
Det sterke sambandet over Nordsjøen, spesielt mellom Edinburgh og Hordaland vart markert under besøket av kaptein Nick Bates som har budd 43 år i Edinburgh. Fylkesvaraordførar Tom-Christer Nilsen tok imot kapteinen og følgjet hans på kaia i Bergen.
Kaptein Nick Bates og fylkesvaraordførar Tom-Christer Nilsen med statuen over Shetlands-Larsen på Bryggen i Bergen.
Nordsjøfarttrafikken
Første stopp var Fløyen, deretter fisketorget, før turen gjekk til Telavåg og Nordsjøfartmuseet. Vitjinga vart avslutta på Haakonsvern der den restaurerte Shetlands-bussen KNM Hitra ligg ved kai.
– Far min var involvert i mottaket av norske flyktningar under krigen som kom med båt over Nordsjøen. Det var difor svært interessant for meg å få orientering om nordsjøfarttrafikken og sjå Hitra som gjekk i denne trafikken under krigen, seier kaptein Nick Bates.
Ved statuen over dei falne under krigen i Telavåg: Kaptein Nick Bates (f.v.), fylkesvaraordførar Tom-Christer Nilsen, varaordførar i Sund, Harald Nordstrand og leiar av den skotske delegasjonen, Martin Hunt.
Kaptein som 11 åring
Kapteinen fortel at han fekk den første båten sin i svært ung alder.
– Eg har alltid likt båtar. Alt som 11 åring vart eg kaptein då eg fekk eigen robåt. Å sigle båtar og skip har både vore hobbyen min og yrket mitt. Det blir vemodig å gå av med pensjon, men eg stiller framleis opp om reiarlaget har bruk for meg.
Furua vart planta i Telavåg i 2005 for å markere 60 år for Shetlandstrafikken av Martin Hunt (i kilt) og den skotske transportministeren Tavish Scott. Hunt forteller fylkesvaraordførar Tom-Christer Nilsen, kaptein Nick Bates og varaordførar i Sund, Harald Nordstrand at treet er blitt dobbelt så høgt på desse fem åra.
Mange gonger i Bergen, men berre andre gong på land
Nick Bates har heile sitt vaksne liv jobba for Cunard Line. 18 år som kaptein og dei siste to åra om bord i Queen Mary 2.
Han var svært nøgd med opphaldet i Bergen.
– Eg har vore i Bergen med Queen Mary 2 meir enn 20 ganger, men dette er berre andre gongen eg er i land her, seier Nick Bates.
Nestleiar ved Nordsjøfartmuseet i Telavåg, Margrethe Kallestad, forteller kaptein Nick Bates om Shetlands-Larsen og nordsjøfarttrafikken.
Skal sjå Nordkapp
Denne siste turen hans går frå Southampton og nordover langs norskekysten til Nordkapp og tilbake til Southampton. Med på turen er 2653 passasjerar frå 43 ulike nasjonar. Tilbake i England mønstrer Nick Bates av, og Queen Mary 2 skal då legge ut på nok en tur over Atlanterhavet til New York, slik passasjerskipa til Cunard Line har gjort i over 100 år. Turen til New York tek i underkant av ei veke.
Kaptein Nick Bates i sitt ess: Ved roret på den gamle Shetlandsbussen, KNM Hitra, som redda nordmenn over Nordsjøen under den andre verdskrigen.
Flaggskipet
Queen Mary 2 er det nye flaggskipet til Cunard Line etter at Queen Elisabeth 2 er ute av drift. Queen Mary 2 vart døpt av dronning Elisabeth 8. januar 2004. Skipet er på om lag 150.000 tonn dødvekt og har ein maksimal fart på 30 knop.
Maskinsjefen på KNM Hitra, Odd Karlsen, orienterer kaptein Nick Bates om den gamle Shetlandsbussen.
På fisketorget i Bergen møtte kaptein Nick Bates fleire av dei 2653 pasasjerane på Queen Mary 2, her 12 år gamle Taylor Convery og mora Alex frå England. – Dette er femte gong vi er i Bergen. Vi skal sjå den gamle delen av byen, seier Alex Convery.