Det er brei semje om at dei globale klimaendringane er menneskeskapte. Dei store utfordringane må løysast gjennom internasjonale avtalar, men vi her i Hordaland må også gjera vårt.
Handlingsprogram
Det er utarbeidd eit eige handlingsprogram med framlegg til mål, strategiar og tiltak: Tiltaka skjer hovudsakeleg på tre område:
Utsleppa av klimagassar skal kuttast med 22 prosent innan 2020, samanlikna med nivået i 1991. Innan 2030 skal utsleppa vera reduserte med 30 prosent. For å finansiera naudsynte tiltak, særleg innan transportsektoren, bør det innførast ei ordning der staten kjøper klimakvotar frå kommunane.
Energibruken i private heimar og i industrien skal reduserast med 30 prosent innan 2020. Ti år seinare skal energibehovet, uansett føremål, i størst mogeleg grad dekkast ved hjelp av fornybare energikjelder. Satsinga på fornybart må likevel skje utan at det fører til tap av naturmangfald.
Føre var
Føre var-prinsippet ligg til grunn for dei føreslegne tiltaka for klimatilpassing. Planen tek det for sjølvsagt at det vil skje menneskeskapte klimaendringar, og at fylket skal vera best mogeleg budd, same kva som skjer.
Første utkast til klimaplan vart sendt ut på høyring like før årsskiftet. Utkastet vekte stort engasjement, og det kom inn 39 høyringsfråsegner, mange av dei med konkrete framlegg. No er fråsegnene innarbeida i planen.
Politisk behandling
Fylkesutvalet har hatt høyringsutkastet til orientering, men utan å gje kommentarar før utkastet vart sendt ut på høyring. Planen skal no opp til omfattande politisk behandling: Kultur- og ressursutvalet (4. mai), samferdsleutvalet (5. mai) og opplærings- og helseutvalet (18. mai), før han igjen skal leggjast fram for fylkesutvalet (20. mai) og behandlast i fylkestinget 8. – 9. juni.
Klimaplan for Hordaland 2010 – 2020 – Regional plan
Klimaplan for Hordaland 2010 – 2020 – framlegg til vedtak
Forslag til handlingsprogram
Meir om klimatiltak i Hordaland fylkeskommune