Sårbarheitsindeksen for Hordaland 2009 syner at Indre Hardanger framleis er den mest sårbare regionen i fylket, då dei skårar relativt høgt på alle dei fem kriteria. Kvinnherad kjem betre ut enn sist på grunn av god vekst i talet på bedrifter.
Hordaland fylkeskommune utarbeider kvart tredje år ein Sårbarheitsindeks for Hordaland, til bruk som grunnlagsdata for arbeidet med omstilling og nyskaping i Hordaland. Føremålet med Sårbarheitsindeksen er å gje ein indikasjon på kva område i Hordaland som er mest utsett eller sårbar for brå eller langvarige endringar i næringsliv og sysselsetjing.
Indeksen skal også seie noko om sterke og svake sider i ulike delar av fylket. Indeksverdiane må tolkast med varsemd og analysen må sjåast på som eit utgangspunkt for vidare drøfting og samarbeid med kommunane.
Folketalsauke i Hardanger
Det som betyr mest for graden av sårbarheit i Indre Hardanger er at regionen er nokså avhengig av arbeidsplassar i store industribedrifter og at regionen ligg an til ein nedgang i folketalet. Den gledelege folketalsauken i Hardanger det siste året kjem ikkje med i indikatorane for 2009. Vonaleg vil den påverke i posisitv lei på neste sårbarheitsindeks.
Indre Hardanger er nokså avhengig av arbeidsplassar i store industribedrifter, som i Ålvik.
Stord/ Fitjar/ Bømlo/ Tysnes er den regionen som i størst grad er avhengig av få store industribedrifter, og regionen har mange arbeidsplassar i vareproduserande næringar elles. Regionen har hatt god netto tilvekst av bedrifter, noko som bidreg til å redusere sårbarheita.
Bergen og Askøy, Os og Fusa og Øygarden og Sotra kjem ut med låge verdiar på indeksen, og framstår dermed som lite sårbare.
Heile rapporten finn du her